Endamê Akademîya Zanistanê Komelkîyan yê Abdullah Ocalanî Duran Kalkanî vat: “Têkoşînê serra 29. yê vera Komployê Mîyanneteweyî ganî têkoşînê rêxistinkerdiş û averberdişê têgêrayîşê komelê demokratîkî û serkewtişê têkoşînê komara demokratîke bo.”
Duran Kalkanî serrgêra 28. yê Komployê Mîyanneteweyî ser o persanê ANF’yî rê cewab da. Komployê Mîyanneteweyî 9ê teşrîna verêne 1998î de ame destpêkerdene. Kalkanî amancê komployî, tesîrê ey ê meseleya kurdan ser o û neticeyê ey ê PKK’yî ser o erjna.
Kalkanî bale ante na ser o ke amancê Komployê Mîyanneteweyî tena qirkerdişê fîzîkî yê Rayber Apoyî nêbî. Eke no nêbîyêne, înan waştêne ke têkoşînê sîyasî bi sîstemê Îmrali bêro astengkerdene. Kalkanî dîyar kerd ke bêçareverdayîşê meseleya kurdan û xorînkerdişê pêkewtişê Rojhelatê Mîyanênî amancanê bingeyînan ê komployî ra yê.
Kalkanî derheqê merheleya nikayine de wina vat: “Hêzê hêrişê komplogeran çend est o, hêzê xoverdayîşê demokratîkî zî hende est o. Qet nêbo hende xurt o. Heta goreyê destpêkî, nika hîna zaf xurt o.”
Kalkanî dîyar kerd ke estbîyayîşê kurdan qebul beno, la heqê înan ê kolektîfî red benê. Kalkanî vat ke nêzdîbîyayîşê “kurdî est ê la heqê înan çin ê” formo newe yê zihnîyetê înkarkarî yo û astenganê verê çareserîya demokratîke ra yew o. Goreyê Kalkanî, bi tecrubeyanê verênan, biqerarîya vîyartişê astengan resaya sewîyeya tewr berze.
Kalkanî derheqê serra 29. de zî wina vat: “Têkoşînê serra 29. ganî têkoşînê rêxistinkerdiş û averberdişê têgêrayîşê komelê demokratîkî û serkewtişê têkoşînê komara demokratîke bo. Ganî ma verê têkoşînê serra 29. de amancanê girdan awan bikerê. Ganî ma nêvajê ‘nêbeno’. Tirkîya nê dewreyî de yan do demokratîk bibo, yan zî do demokratîk bibo. Ci ra teber çîyê xirabî benê. Eke ma nê çîyan ser o nêfikirîyenê, o wext ganî ma bieşkê çîyanê raştan aver berê.”
