Rayberê Şarê Kurdan Abdullah Ocalanî, Torîno ya Îtalya de konferansa bi nameyê “Rojhelatê Mîyanênî de Seba Aştîye Perspektîfêk” rê peyamêko nuşte şawit û vat: “Ganî sîyaset cayê çekan bigîro, huqûq cayê bêbawerîye bigîro û seypêyî cayê înkarî bigîro. Rayîra aştîya domdare na ya.”
Şaredarîya Torînoyî, Komîteya Huqûqê Merdiman a Herêmî û Rêveberîya Herêmî ya Pîemonteyî reyde û bi piştîdayîşê Wexfê Teserûfê yê Torînoyî, konferansa bi nameyê “Rojhelatê Mîyanênî de Seba Aştîye Perspektîfêk” organîze keno. Zaf sîyasetmedar, şaredar, aktîvîstê cinîyan, pawitoxê huqûqî, nûnerê rêxistinanê demokratîkan û dostê kurdan beştarê konferansî benê.
Rayberê Şarê Kurdan Abdullah Ocalanî Konferansa Torînoyî rê peyamêko nuşte şawit.
Peyamê Rayberê Şarê Kurdan Abdullah Ocalanî no yo:
Ez şima Îmralî ra, bi hîsanê piştgêrîya mîyanneteweyî û azadîye silam kena. Hêvî kena ke konferansa şima bibo ardimkar seba awankerdena yewbîyayîşê têdûşt, azadîya şaran û aştîya mendîye ya Rojhelatê Mîyanênî de.
Rojhelato Mîyanên ewro mîyanê qonaxêka muhîme de yo. Şer, têkewtiş, çareyê dewlet-neteweyî û polîtîkayanê asayîşî şaran rê haştî û azadî nêardî. No çî êdî eşkera yo. Coka wezîfeyê ma yo bingeyên o yo ke ma sîyasetê şerî ra fek vera bidê û sîyasetê demokratîkî esas bigêrê; komelî rêxistin bikerê û dewrêko newe yo ke cuya hempare ya azade û têdûştî ya şaran garantî keno awan bikerê.
Perspektîfê konfederalîzmê demokratîkî û Komara Demokratîke, sernameyanê bingeyênan ê nîqaşê na gêrayîşî ra yê.
Fesixkerdişê PKKyî û qedîyayîşê stratejîya têkoşînê çekdarî, ganî sey destpêkê dewrêko newe bêro vînayene. Ena bedilîyaye, seba mesele nêzîkbîyayîşêko newe û çimçarnayîşêko newe zî mecbûr kena.
Ganî ma bi eşkerayî vajê ke tenya qedîyayîşê têkoşînê çekdarî nêno maneya haştîye. Seba ke netîceya prosesî de haştîye mayînde biba; ganî sebebê pevçûnî mîyan ra bêrê wedaritene, estbîyayîş, ziwan û kulturê Kurdî bêrê garantîkerdene, astengîyê verê sîyasetê demokratîkî bêrê wedaritene û hemwelatîya seyyebinîye bireso garantîya hiqûqî.
Entegrasyono demokratîk, ne têhetamayîşêko yewhetî yo û ne zî tewrbîyayîşê bêşert o yê mîyanê sîstemê estî de. Eksê naye, ganî bibo bedilîyayîşêko demokratîk ke cîyabîyayîşî nînê înkarkerdene, heqî yenê naskerdene û cuya hempare serê bingeyê seyyewbinîye de yena awankerdene.
Berdêlê sîyasetê demokratîkî komara demokratîke ya, garantîya komela demokratîke zî hiqûq o. Bê garantîyanê hiqûqîyan sîyasetê demokratîk mende nêbeno û prosesê haştîye zî nêreseno serkewtişî.
Çareserkerdişê meseleya Kurdî, demokratîkbîyayîşê Tirkîya ra cîya nêno fikirîyene. Demokratîkbîyayîşê Tirkîya zî vejîyayîşê îradeyêko sîyasî yo ke cuya hempare, têdûşte û azade ya şaran temîn keno ra cîya nîyo.
Muhîmîya perspektîfê konfederalîzmê demokratîkî ya seba Rojhelatê Mîyanênî zî tîya de ya. Çareserî; binê yew nasnameyî de vîlakerdişê yan zî helênayîşê şaran nîya. Sînorî û cîyabîyayîşî benê çimeyê têkewtişanê neweyan.
Çîyo ke ewro hewcetî pê esta no yo: Dermanê sîyasetê şerî sîyaseto demokratîk, cayê înkarî de naskerdene, cayê zorî de hiqûq û cayê parçebîyayîşê komelkî de cuya hempare ya azade û seyyewbinî. No vurîyayîş mecbûr keno ke dewlet û aktorê sîyasî mesulîyet bigêrê serê milanê xo, dezgehê demokratîkî hîna zaf bêrê xurtkerdene û komel derheqê ameyoxê xo de bibo wayîrê vatene û biryare.
Dostê ezîzî, ez hêvî kena ke na konferanse perspektîfê konfederalîzmê demokratîkî şert û mercanê ewroyî de nîqaş bikero û rayîranê dîyarkerdan ê çareserîya demokratîke bikero eşkera. Ameyoxê Rojhelatê Mîyanênî şeranê neweyan û têkîlîyanê neweyan ê îqtîdarî de nîyo, awankerdina komela demokratîke de yo. Xelisîyayîş yewbîyayîşê azad ê şaran de û xurtkerdişê sîyasetê demokratîkî de yo.
Ganî sîyaset bikewo cayê çekan, hiqûq bikewo cayê bêbawerîye, û têdûştîye bikewa cayê înkarî. Rayîrê aştîya mendîye no yo. Ez konferansa şima reyna, bi bawerîya xo ya seba aştî û azadîye silam kena.
Abdullah Ocalan
Îmrali”
