Ankara – Rojnameger Amed Dîcle ke tewrê Konferansê Kurdan yê 20. yê Parlamentoyê Ewropa bî, dîyar kerd ke babeta bingeyêne ya konferansî Prosesê Aştî û Komelê Demokratîkî bî û wina vat: “Dîplomasî û sazgehê kurdan cehd kenê ke dezgehê fermî û nefermî bi heme hêzê xo prosesî de ca bigîrê. Sazgehê kurdan wazenê ke Yewîya Ewropa wayîrê prosesê Tirkîya û Vakurê Kurdîstanî vejîyo û seba prosesî rolê xo kay bikero.”
Komîsyonê Hemwelatijanê Tirkîya-Yewîya Ewropa (EUTCC) Konferansê Kurdan yê 20. yê Parlamentoyê Ewropa bi sernameyê “Yewîya Ewropa, Tirkîya, Rojhelatê Mîyanênî û Kurdî” 14 û 15ê teşrîna verêne de paytextê Belçîka Bruksel de viraşt. Endama Komîteya Têkilîyanê Teberî ya Meclîsê Şarî yê Sûrîye Îlham Ehmede, endama Heyetê Îmrali yê DEM Partî Pervîn Buldane, aktîvîsta TJA’yî Sebahat Tuncele, rojnameger, aktîvîst, sîyasetmedarê kurdan, akademîsyen, huqûqnas û grûbê Çepgiran (The Left), Kesk/EFA û Sosyalîst û Demokratan tewrê konferansî bîyî. Rayberê Şarê Kurdî Abdullah Ocalanî zî Îmrali ra konferansî rê mesajêk erşawitbî. Konferans 2 rojî dewam kerd û bi 20 pêşnîyazan qedîya; pêşnîyazan de seba averberdişê prosesî statuyê Rayberê Şarê Kurdî Abdullah Ocalanî vejîya vernî.
‘Emser goreyê serranê vîyarteyan tewrbîyayîşêko hîna xurt bî’
Amed Dîcleyî îfade kerd ke konferans 2004 ra nat her serre Parlamentoyê Ewropa de yeno viraştene: “Ez konferansê verênî de zî bîya. O wext babete zêdeyêr endamîya Tirkîya ya Yewîya Ewropa bî; dîplomasîya kurdan vatêne ke seba endamîye ganî Tirkîya meseleya kurdan çareser bikero. 20 serrî yo ke nameyê konferansî eynî yo la goreyê rewşa sîyasî babetê cîya-cîyayî yenê qiseykerdene. Emser goreyê serranê vîyarteyan tewrbîyayîşêko hîna xurt bî. Raportorê Tirkîya yê Parlamentoyê Ewropa zî ame konferansî û behsê pêvînayîşanê xo yê berpirsîyaranê AKP’yî reyde kerd.”
‘Mesajê Rayberê Şarê Kurdî’
Amed Dîcleyî bale ante mesajê Rayber Apoyî ser o: “Mesajê Rayber Apoyî hetê Ewropa ra zî nêzdî ra yenê taqîbkerdene. Yewîya Ewropa verê cû seba ke şer dewam bikero piştîdayîşê Tirkîya kerd. Badê cû Yewîya Ewropa zaf rey piştîdayîşê xo yê prosesî eşkera kerd la no piştîdayîş heta nika nêbîyo sîyasetêk. Vizêr raportorî vat ke ê piştîdayîşê prosesî kenê û çîyo ke birêz Ocalanî kerdo, çîyo tewr aqilane yo. Raportorî zî îfade kerd ke Komîsyonê Yewîya Ewropa nêwazeno bikewo mîyanê mesele ke proses hîna xirab nêbo. 1999 de Yewîya Ewropa vatbî ke heme berê Ewropa ey rê padayeyî yê. Wexto ke Rayber Apo seba çareserîye şi Ewropa înan ey Ewropa ra vet û teslîmê Tirkîya kerd. Eke o wext dewletanê Ewropa berê xo akerdêne û komplo nêbîyêne no problem do çareser bibîyêne. Coka rolê Ewropa zî nê neçareserîye de esto; ganî êdî naye ra dersêk bivejê.”
‘Yewîya Ewropa hema wayîrê nê prosesî nêvejîyaya’
Amed Dîcleyî îfade kerd ke pêşnîyazê konferansî do bêrê raporkerdene û sazgehanê Ewropa rê bêrê erşawitene; konferans de tewr zaf Prosesê Aştî û Komelê Demokratîkî ame erjnayene: “Rewşa Iraq, Îran û Sûrîye û rewşa nêdemokratîkbîyayîşê Tirkîya zî bi no proses ra girê dîyayî; yanî serkewtişê nê prosesî do nê problemanê pêroyî rê bibo derman. Tayê rexneyî zî bîyî ke proses nêyeno komelîkerdene; la zêdeyêr hukmatê AKP’yî ame rexnekerdene. Yewîya Ewropa hema wayîrê nê prosesî nêvejîyaya; rolo ke ganî Yewîya Ewropa kay bikerdêne, heta nika nêkerdo. Eke piştîdayîşê prosesî nêkenê zî, wa vera prosesî nêvejîyê; çunke eke Yewîya Ewropa vera prosesî vejîyo, no beno astengêko gird. Ez hêvî kena ke demanê ameyoxan de Ewropa de seba prosesî înîsîyatîfêk fermî virazîyo.”
