Heyetêk Têgêrayîşê Cinîyanê Kurdan ra tewrê Kombîyayîşê 39. yê Cîyayîye û Cinîyanê Zafneteweyî yê Mîyanneteweyî bî. Kombîyayîş 10-12ê teşrîna verêne de ame viraştene.
Kombîyayîşê 39. yê Cîyayîye û Cinîyanê Zafneteweyî yê Mîyanneteweyî şaristanê Cordoba yê Arjantînî de ame viraştene û bi se hezaran cinîyê herêmanê cîyayan yê Amerîkaya Latînî ardî têhet. Kombîyayîş bi organîzekerdişê 300 rêxistinanê herêmkîyan ame viraştene; tede atolye, panel, mojnayîşê fîlman û kombîyayîşî ameyî viraştene.
Heyetêk Têgêrayîşê Cinîyanê Kurdan ra, tora cinîyan ya Abya Yala reyde tewrê kombîyayîşê enternasyonalîzmî bî. Heyet tewrê panela ‘Pratîkê Şoreşgerî’ û mojnayîşê fîlmê In Search of Alina (Cigêrayîşê Alina de) bî. Çalakîyan de cinîyanê kurdan tecrubeyê xo, şorişê cinîyan yê Rojava, têkoşînê gerîlayanê cinîyan yê koyanê Kurdîstanî û muhîmîya piştîdayîşê mîyanneteweyî ardî ziwan.
‘Kombîyayîş de behsê Prosesê Aştî û Komelê Demokratîkî ame kerdene’
Kombîyayîşê enternasyonalîzmî de, ke hetê Têgêrayîşê Cinîyanê Kurdan û tora femînîste ya Abya Yala ra ame viraştene, hetê mîyanneteweyî yê têkoşînê cinîyanê kurdan û muhîmîya tora ‘Cinî Ameyoxî Mûnayenê’ ame erjnayene. Kombîyayîş de sloganê ‘Zafneteweyî, zaf netewe yo; Abya Yala ra heta Kurdîstanî!’ ame berzkerdene. Persanê tewrbîyayoxan rê cewabî ameyî dayene û behsê Prosesê Aştî û Komelê Demokratîkî ame kerdene.
‘Têkoşînê Alina Sancheze ame vatene’
Kombîyayîş de fîlmê In Search of Alina ame mojnayene; fîlm cuye û têkoşînê şorişgera enternasyonalîste Lêgerîn Çîya (Alina Sanchez) ser o yo. Alina Sanchez şaristanê Cordoba de pîl bîbî û 2018 de Rojava de şehîd bîbî. Mojnayîşê fîlmî de heyetê Têgêrayîşê Cinîyanê Kurdan reyde perwerdekar û rojnameger Claudia Korole û dayîka Alina Sancheze zî qisey kerd.
Heyet roja yewşemeyî siba tewrê kombîyayîşê meclîsê akerdî yê Tora Cinîyanê Abya Yala bî; tede muhîmîya rêxistinbîyayîş û pêşengîya cinîyan ame dîyarkerdene. Kombîyayîş de firsendê têkoşînê hemparî û piştîdayîşê mîyanneteweyî vejîyayî ver. Çalakî bi munaqeşeyanê azadîya cinîyan qedîya; azadîya cinîyan sey babetanê bingeyênan yê têkoşînê seserra 21. ra yew ameye erjnayene.
