Riha – Girewteyo nêweş Celal Yildirim ke semedê krîzê zerrî ganê ey tehluke de bî û nêweşxane de tedawî bîyêne, reyna ame sewqkerdene hepisxane.
Girewteyo nêweş Celal Yildirim (56) Hepisxaneyê Tîpê T yê Hûmare 2 yê Hîlwanî de yeno tepiştene. Celal Yildirimî 2yê teşrîna verêne de hucreya xo de krîzê zerrî derbas kerdbî. Badê krîzî Celal Yildirim ameybî sewqkerdene nêweşxane û uca tedawî bîyêne. Ame zanayene ke Celal Yildirim ewro reyna ame berdene hepisxane.
Keyeyê Celal Yildirimî semedê rewşa weşîya ey ya girane endîşe de yo. Keyeyî seba ke tedawîya ey teber de dewam bikero muracatê dozgerîye kerdbî. La ame zanayene ke heta nika muracatê keyeyî rê tu cewab nêameyo dayene.
