Fermandarîya Yewîneyanê Pawitişî yê Rojhelatê Kurdîstanî (YRK) derheqê hêrişanê hêzanê Îranî yê vera qadanê xo de eşkerayîyêk daye û vat: “Hêzanê ma hişyarîya lazime daya. Eke hêriş dewam bikerê, ma do cewabê lazimî bidê.”
Eşkerayîye de wina ame vatene: “Nê demanê peyênan de reyna hetê rejîmê Îranî ra vera hêzanê ma hêrişî yenê kerdene. Seba ke raya pêroyî zî her hêrişî bizano, ma pare kenê. Ma verê cû zî dîyar kerdbî; nika reyna vanê ke vera her hêrişê ke şar û hêzanê ma ser o beno, ma do heqê xo yê pawitişê meşruyî bişuxulnê.”
Goreyê eşkerayîye, rejîmê Îranî 13ê teşrîna verêne ra nat herêma Şahoyî de hêzêk Pasdaranî bi çekanê giranan û dronanê kamîkazeyan ê bombarkerdeyan ronayo. 13ê teşrîna verêne de dişmenî bi dronanê kamîkazeyan û çekanê giranan herêma Deştê Qilbî bombarduman û topbaran kerd. 15ê teşrîna verêne de zî saetanê sibayî de verê cû bi çar dronanê kamîkazeyan, dima heta teştareyî herêma Kela Terzan hetê hêzanê Pasdaranî ra ameye bombardumankerdene. Herême de zaf leşkerî ameyê ronayene û aseno ke hereket û hêrişanê xo yê vera hêzanê YRK’yî de na herême de israr kenê.
YRK’yî dîyar kerd ke hetê hêzanê înan ra seba nê hêrişan hişyarîyê lazimî ameyê kerdene: “La no nê manaya nêdano ke ma do tim sewîyeya hişyarîyan de vindê. Eke nê hêrişî dewam bikerê, sey Yewîneyanê Pawitişî yê Rojhelatê Kurdîstanî ma do heta peynî heqê xo yê pawitişê meşruyî bişuxulnê û cewabê lazimî bidê.”
