Bedlîs – Keskîn Bayindirî pêvînayîşê şarî yê Tetwanî de qisey kerd û bale ante prosesî ser o ke bi sayeyê têkoşînê serran dest pêkerdo: “Êdî ma seba çareserîye hêzêk ê.”
Partîya Herêmanê Demokratîkan (DBP) çarçewaya pêvînayîşanê şarî yê bi sloganê ‘Ma vatişê aştîye şarî reyde awan kenê’ de qezaya Tetwan ya Bedlîsî de temsîlkaranê rêxistinanê sivîlan reyde kom bî. Hemserekê Pêroyî yê DBP’yî Keskîn Bayindir tewrê pêvînayîşî bî ke yew kargeh de ame viraştene. Salona pêvînayîşî de pankarta “Ma vatişê aştîye şarî reyde awan kenê” ameye dardekerdene.
Keskîn Bayindirî pêvînayîş de dîyar kerd ke prosesêko muhîm yê aştîye ra yeno vîyartene û prosesê çareserîye yê verênî ke ser nêkewtî vîr ardî. Keskîn Bayindirî bale ante Prosesê Aştî û Komelê Demokratîkî ser o ke Rayberê Şarê Kurdî Abdullah Ocalanî da destpêkerdene: “Nê prosesî de ganî merdim tena dewlete nêpawo la seba averşîyayîşê prosesî ganî hukmat gaman bierzo. 2 serrî yo ke merdene û pêkewtişî çin ê; no çîyêko bierj o. La meseleya kurdan tena ‘caverdayîşê çekan’ nîya. No rayîrê çareserîya meseleya kurdan o. Şarê kurdan statuyê xo wazeno, destûr de naskerdişî wazeno. 2 serrî yo ke ma her koşeyê welatî de behsê aştîye kenê. Ma wazenê vatişê aştîye şarî reyde vajê û fikranê şar û komelî bigîrê.” Serekê Yewîya Odeyanê Esnaf û Zenaatkaran yê Bedlîsî Ayvaz Canevîyî zî dîyar kerd ke ê peyê prosesî de yê û sey rêxistinanê sivîlan seba prosesî çi lazim bo, do bîyarê ca.
‘Vera zulmî serewedarîyayîş est ê’
Badê pêvînayîşê rêxistinanê sivîlan, dewa Avêtaxî ya Tetwanî de pêvînayîşê şarî ame viraştene. Keskîn Bayindirî uca zî qisey kerd: “Ma pêro tarîxê kurdan û tarîxê têgêrayîşê xo zanenê û munaqeşe kenê. Seyan serran o ke vera zulmî serewedarîyayîş est ê. Bi têkoşînê Têgêrayîşê Azadîya Kurdan û Rayber Apoyî vera înkarî têkoşînêk ame dayene. Netîceyê têkoşînî de hukmat û dewletanê herême Rayberê ma kerd muxatab. 2 serrî yo ke masaya muzakere û çareserîye est a. No netîceyê hêzê têkoşînê nê têgêrayîş û Rayber Apoyî de ame ca. Êdî ma seba çareserîye hêzêk ê.”
Badê cû hemwelatijan ke qisey kerd, dîyar kerd ke bawerîya înan bi Abdullah Ocalanî temam a û qetî kerd ke ganî îqtîdar gaman bierzo û seba averşîyayîşê prosesî cehd bikero. Pêvînayîşî do dewanê Şîrînşas û Siwarê de dewam bikerê.
