Platformê Cinîyan ê Seba Seyyewbînîye (EŞIK) da zanayîş ke Paketê Edlîye yê 13. ra tertîbê nefeqaya feqîrîye ame vetiş. No tertîb waştêne ke nefeqaya feqîrîye bi wextêko dîyarkerde sînordar bikero. Platformî venga cinîyan da ke seba tertîbanê ‘qedênayîşê lezî yê zewacî’ û ‘mîyankarîya keyeyî’ zî mucadeleyê xo dewam bikerê. Nê her di tertîbî hema paket de yê û pawenê ke qanûnî ra bivîyarê.
Platformê Cinîyan ê Seba Seyyewbînîye (EŞIK) no qerar sey neticeyê mucadeleyê pîyayî yê têgêrayîşê cinîyan erjna. Platformî eynî wextî de îqaz kerd ke no babet ameyox de reyna eşkeno bêro rojeve.
No tertîb wextêko derg raya pêroyî de babetê munaqeşeyî bî. Dadgeha Qanûnê Bingeyî (AYM) madeyê qanûnî yê derheqê nefeqaya feqîrîye de ra çekuya ‘bêwext’ betal kerdbî. Naye ra pey babet reyna ame rojeve. Hêvî bîyêne ke bi taslaxo hedre, nefeqa bi wextêko dîyarkerde bêro sînordarkerdiş û no caardiş ameyox de zî dewam bikero.
EŞIK’î eşkerayîya xo de dîyar kerd ke qerarê vetişê nê tertîbî de nê xebatan tesîr kerdo: pêvînayîşê rêxistinanê cinîyan û partîyanê sîyasîyan, xebatê raporkerdişî, eşkerayîyê çapemenîye û kampanyayê medyaya komelkîye. Platformî dîyar kerd ke no qerar neticeyê helwesta pîyayîye ya cinîyan o ke fikrê înan ê sîyasîyî cîya yê.
‘EŞIK: Wa qedênayîşê lezî yê zewacî û mîyankarîya keyeyî zî bêrê vetiş’
Platformî îfade kerd ke vetişê tertîbê nefeqa paket ra, mucadeleyî rê peynî nêano. EŞIK’î bale ante babetanê ‘qedênayîşê lezî yê zewacî’ û ‘mîyankarîya keyeyî’ ser ke pawenê Paketê Edlîye yê 13. de ca bigîrê. Platformî vat ke seba vetişê nê tertîban zî piştîdayîşêko zafêr û yewbîyayîşêko hîra lazim o.
Eşkerayîye de ame vatiş ke cinîyî feqîrîye, bêkarîye û zehmetîyanê debara cuye reyde mucadele kenê. Coka hedefgirewtişê heqê înan ê nefeqa eşkeno tehlukeyê şîdetê ekonomîkî zêde bikero. Platformî dîyar kerd ke o gamanê ke heqanê cinîyan ê bi mucadele ameyî destkewtiş ra hedef gênê, taqîb keno.
Vetişê tertîbê nefeqa paket ra seba nika manaya gamêkê peyser dano. La no qerar nê mana de nîyo ke no babet ameyox de reyna nêbeno rojeve. EŞIK’î eşkerayîya xo de qetî kerd ke vera ihtîmalan ganî mucadele dewam bikero.
