ÎSTENBOL – EŞÎK, bi munasebetê caardişê Peymana Îstenbol û serrgêra sazgehbîyayîşê xo de eşkerayîye daye. EŞÎK, eşkerayîya xo de dîyar kerd ke ê do seba awankerdişê ameyox û pawitişê heqê cuyê cinîyan xoverdayîşê xo bidomnê.
Platformê Cinîyan ê Seba Seyyewbînîye (EŞÎK), bi munasebetê caardişê Peymana Îstenbolî yê Tirkîya de û serrgêra sazgehbîyayîşê xo de hesabê xo yê medyaya dîjîtale ser o eşkerayîyêka nuştekî vila kerd.
Eşkerayî de ame vîrardene ke EŞÎK, 1ê tebaxa 2020î de, wexto ke hêriş vera heqanê destkewteyê ê cinîyan ser o zêde bîbî, ameyo sazkerdene. Eşkerayî de ame vatiş ke sazkerdişê platformî, yeno manaya rêxistinbîyayîşê bi formêko newe yê têkoşînê çend des serran ê têgêrayîşê cinîyanê Tirkîya yo. Sewbîna ame dîyarkerdene ke platformî waştişê seyyewbînî û edaletî heme waranê cuye de girdêr kerdo.
Peymana Îstenbolî tena yew metin nîya; dewlete rê berpirsîyarîya vernîgirewtiş, seveknayîş, tehqîqat û averberdişê pêroyî polîtîkayan arda, peymane, “belgeyêko tarîxî yê heqanê merdimî” ya.
Eşkerayî de bale ante nê çî ser ok ke badê xoantişê peymane, kiştişê cinîyan û tedaya vera cinîyan zêde bîyî. Sewbîna ame dîyarkerdene ke têkoşînê vera hêrişanê Qanûnê Medenî, heqê nafaqa û seyyewbînîya cinsî ya komelkî ser o do dewam bikero.
Peynîya eşkerayî de ame îfadekerdene ke EŞÎK bi hêzêko ke tecrubeyanê xo yê 6 serran ra bi dest kerdo seba ameyoxê xo ver bido, bi qerardarî pawitişê laîkîye, hemwelatîya seyyewbînîye û dewleta huqûqî ya sosyal demokratîk û heqê cinîyan ê cuye bidomnê.
