Merkezê Heqê Cinîyan ê Baroyê Amedî “Heqê nefeqa, caardiş, polîtîka û kiştişê cinîyan” ser o Çand Amed de kombîyayîşêk viraşt. Avûkat Îrem Îlhan dîyar kerd ke muneqeşeyê înan ê ewro de do tena zanyarîyêka huqûqî nêro berardiş, eynî wextî de do bibo wesîleyê averşîyayîş, ewnîyayîşêko raştêr, edîlane û heqperwer.
Bi pêşengîyê Merkezê Heqê Cinîyan ê Baroyê Amedî, “Heqê nefeqa, caardiş, polîtîka û kiştişê cinîyan” ser o Çand Amed de kombîyayîşêk viraşt. Komeleya cinîyan, huqûq, endam û rayberîyê cinîyan ê baroyê vakurî tewrê kombîyayîşî bîyî. Rayberîya Merkezê Heqê Cinîyan ê Baroyê Amedî Avûkat Îrem Îlhan destpêkê komxebate de qisey kerd.
‘Ganî her telîmatnameyê ke heqê cinîyan zeîf kenê, bi hawayêko baldar bêrê erjnayene’
Îrem Îlhan îfade kerd ke ê ewro tena seba qiseykerdişê telîmatnameyêko huqûqî nê, seba heqanê ke raştaraşt tesîrê cuyê cinîyan kenê, resayîşê înan ê edalet û xoverdayîşî seyyewbînîye kom bîyî û vat: “Kombîyayîşê ma de di babetê muhîmî estê; heqê nefeqa û kiştişê cinîyan. Her çiqas nê her di babetî ewnîyayîşê ewilinî de xoser biasê zî, ma baş zanê ke şîdetê ekonomîye, bêcezayîye û cînsîyetê komelkî yewbînan ra cîya nênê fikirîyayîş. Badê cêra bîyene, seba cinîyan ke ewleyîya ekonomîye ra mehrum manenê, çemberê şîdetî ra vejîyayîş û xo newe ra awankerdişê cuye zaf zehmetêr beno.
Wextanê peyînan de, taybetî çarçewaya Paketê Hukmî ya 12. de, sînordarkerdiş yan zî wedaritişê nefeqa bêmudet ame rojev. Sey Merkezê Heqê Cinîyan ê Baroyê Amedî, ma waşt verê her çî beramberê nê muneqeşê pratîk de bimojne. Doneyan mojna ma ke nimûneyê nefeqaya berz ê ke raya pêroyî de yenê vatiş, raştîye nêmojnenê; eksê nê çî, mîqdarê nefeqaye zaf rayan tedarîkerdişê lazimîyê tewr bingeyî yê cinîyan ra zî zaf dûrî yê. Nê serdemî de ke xizanî hende xorîn bîya de, wexta ma qalê wedaritişê nefeqa muneqeşe kenê, nêeşkenê şert û mercê cuya raştî ya cinîyan pêgoş bikerê. Nê semedî nefeqa îmtîyazêk nîyo; nefeqa ewleyîyêka huqûqî ya ke hetanê dezavantajan û prensêbê dewleta sosyale mojnena. Bêguman huqûq warêko ganî yo û eşkeno bivurîyo; la komelêko ke cinî
hema zî nêseyyewbînîya ekonomîk rê rî bi rî yê û barê keda wayîrkerdişî zaferî milê înan ser o yo, ganî her telîmatname ke heqê destkewteyî ê cinîyan zeîf keno, bi baldarî bêrê erjnayene. Ez bawer kena ke muneqeşeyê ewro do tena zanyarîyêka huqûqî nêro berardiş, eynî wextî de do bibo wesîleyê averşîyayena, ewnîyayîşêko raştêr, edîlane û heqperwer.
Badê qiseykerdişanê destpêkî konferans çapemenî rê girewte dewam kerd.
