Merdimê Vîndîbîyayan û Şûbeyê ÎHD’yî yê Amed, Êlih û Colemêrgî no hewte zî çalakîya xo domna. Çalakîyanê nê hewteyî de aqûbeta Huseyîn Aydemîr, Fehmî Tosun, Yilmaz Gumuş, Enter Ozdemîr û Bapîr Çitakî ame persayîş û ame waştiş ke faîlî bêrê muhakemekerdiş.
Merdimê Vîndîbîyayan û Komela Heqê Merdiman (ÎHD) no hewte zî çalakîya xo ya “Wa Vîndîkerdeyî Bêrê Vînayîş, Faîlî Bêrê Muhakemekerdiş” ke her hewte virazenê, domna. Çalakîyanê nê hewteyî de aqûbeta Huseyîn Aydemîr, Fehmî Tosun, Yilmaz Gumuş, Enter Ozdemîr û Bapîr Çitakî ame persayîş.
AMED
Merdimê Vîndîbîyayan û rayberanê Şûbeya ÎHD’yî ya Amedî çalakîya xo ya “Wa Vîndîkerdeyî Bêrê Vînayîş, Faîlî Bêrê Muhakemekerdiş” hewteyo 923. de, verê Abîdeya Heqê Cuyayîşî ya Parka Koşuyoluyî ya qezaya Rezanî ya Amedî de viraşt. Pawitoxê heqê merdiman, endam û rayberê sazgehanê sîvîl ê komelkî û merdimê vîndîbîyayan tewrê çalakîye bîyî. Çalakîye de fotografê kesê ke ameyê vîndîkerdiş ameyê berzkerdiş.
ÎHD û merdimê vîndîbîyayan çalakîya nê hewteyî de aqûbeta Huseyîn Aydemîr û Fehmî Tosunî persayî. Nê her di kesî 19ê teşrîna verêne ya 1995î de Îstanbul de hetê polîsanê sivîlan ra ameybî destbendkerdiş û a roje ra nat tu agahî înan ra nêameybî girewtiş.
Sekreterê Şûbeya ÎHD’yî ya Amedî Firat Akdenîzî destpêkê eşkerayîye de Hatûn Aslane vîr arde ke vizêrî ganê xo ra bîye û wina va: “Serran o ke ma embazanê xo yê vîndîbîyayan vîr anê û ma êdî nêwazenê mîyanê na nêeşkerayîye de biciwîyê. Emrê ma nê qadan de bi cigêrayîşê vîndîbîyayanê ma vîyareno. Vera bêqanûnîya ke dewlete ma rê kerda, ma her şert de no ard ziwan. Çend serrî bivîyarê zî ma do tim aqûbeta vîndîbîyayanê xo bipersê; heqê ma est o ke naye bizanê û heta ke ma aqûbeta înan bizanê, ma do nê qade de bê.”
‘Wa Meclîs qerar bido û nê merdimî bêrê vînayîş’
Badê Firat Akdenîzî, waya Fehmî Tosunî Kiymet Zengîne vat ke dewlete ra aqûbeta birayê xo persena û wina va: “Ez zana ke dewlete o girewto, destbend kerdo. Bi zorî eşt erebe û berd. Ez dewaker a. Ez venga Wezîrê Edaletî dana. Wa Meclîs qerar bido û nê merdimî bêrê vînayîş.”
Parlamenterê Yenî Partî Sezgîn Tanrikulu zî bale ante Prosesê Aştî û Komelê Demokratîkî ser o û wina va: “Caverdayîşê çekan û qedîyayîşê pêkewtişan tena manaya aştîya komelkî nêdano. Bê edaletî aştîya komelkî nêbena. Coka ganî aştîya komelkî nê meydanî ra bivîyaro. Ganî nê merdiman reyde rîbirîbîyayîş bibo. Bê naye ma nêeşkenê prosesê aştîya negatîfe ra derbazê prosesê aştîya pozîtîfe bibê.”
Endama Komîsyonê Vîndîbîyayan ê ÎHD’yî Berfîn Elçî hîkayeya vîndîkerdişê Huseyîn Aydemîr û Fehmî Tosunî wende.
Eşkerayî bi çalakîya roniştişî qedîya.
ÊLIH
Merdimê Vîndîbîyayan û rayberanê Şûbeya Komela Heqê Merdiman (ÎHD) a Êlihî hewteyo 759. de çalakîya xo ya “Wa Vîndîkerdeyî Bêrê Vînayîş û Faîlî Bêrê Muhakemekerdiş” verê Abîdeya Heqê Merdiman a Cadeya Gulistanî de viraşt. Çalakîya nê hewteyî de aqûbeta Yilmaz Gumuşî ame persayîş. Yilmaz Gumuş 21ê teşrîna verêne ya 1993î de taxa Yeşîltepe ya Êlihî de hetê kesanê nêzanayeyan ra ameybî remnayîş û a roje ra nat tu agahî ey ra nêameybî girewtiş. Rayber û endamê ÎHD’yî, Merdimê Vîndîbîyayan, rayberê partîyanê sîyasîyan ê bajarî û xeylî kesî tewrê çalakîye bîyî û fotografê kesanê ke destbendî de ameyê vîndîkerdiş û qetilkerdiş ameyê berzkerdiş. Raybera ÎHD’yî ya Êlihî Mîzgîn Aravîne hîkayeya vîndîkerdişê Yilmaz Gumuşî wende.
Eşkerayî bi deqîqeyêk çalakîya roniştişî qedîya.
COLEMÊRG
Şûbeya Komela Heqê Merdiman (ÎHD) a Colemêrgî û Merdimê Vîndîbîyayan zî çalakîya xo ya “Wa Vîndîkerdeyî Bêrê Vînayîş, Faîlî Bêrê Muhakemekerdiş” hewteyo 249. de Kuçeyê Hunerî yê Geverî de viraşt. Çalakîya nê hewteyî de aqûbeta Enter Ozdemîr û Bapîr Çitakî ame persayîş ke 5ê teşrîna verêne ya 1994î de dewa Tiyarê ya qezaya Çeleyî de destbendî de ameybî vîndîkerdiş.
Eşkerayî hetê Hemserekê Şûbeya ÎHD’yî yê Colemêrgî Ozan Akbaşî ra ame wendiş. Eşkerayîye de ame dîyarkerdiş ke 31 serrî yo faîlê Enter Ozdemîr û Bapîr Çitakî nêameyê muhakemekerdiş.
Eşkerayî bi çalakîya roniştişî qedîya.
