Amed – Şarê Farqînî bi pêşengîya Platformê Şiyar Be vera hişbir û fuhşî rayîrşîyayîşêk viraşt û vat: “Ma do Farqîn de vera hişbir û sîyasetanê ke vera cinî û komelî yenê ramitiş bêveng nêmanê.”
Bi pêşengîya Platformê Şiyar Be yê Farqînî verê Parka Rindêxane de vera hişbir û fuhşî rayîrşîyayîşêk ame viraştiş. Parlamentera DEM Partî ya Amedî Ceylan Akça, sîyasetmedar, endam û temsîlkarê sazgehanê sivîlan û xeylî kesî tewrê rayîrşîyayîşî bîyî. Rayîrşîyayîş de pankartê “Girêdaye Mebe, Azad Be” ameyî berzkerdiş. Tewrbîyayoxan cayê rayîrşîyayîşî ra heta çarşîya Farqînî bê vindertiş slogan berz kerdî û venga şarê Farqînî da ke tewrê têkoşînê înan bibo. Badê rayîrşîyayîşî verê Qaymeqamîya Farqînî de eşkerayî ame wendiş; Hemserekê DBP’yî yê Farqînî Mehmet Bakirogluyî eşkerayîye wende.
‘No têkoşîn berpirsîyarîya hempare ya heme şarê Farqînî ya’
Mehmet Bakiroglu dîyar kerd ke do Farqîn de pîya vera hişbir û fuhşî têkoşînê xo berz bikerê û wina vat: “Têkoşînê vera hişbir û fuhşî ke komelê ma, ciwananê ma û ameyoxê ma keno hedef, berpirsîyarîya hempare ya ma pêroyî ya. Ma do Farqîn de qet nêverdê ke ameyoxê tu ciwanêkê ma tarî bibo û tu keyeyê ma vera nê problemî tena bimano. Ma bi fehmêk ke yewîya komelkî û cuyêka azad û weşe esas gêno, reyna bi hêzdar îlan kenê ke ma vera hişbir û vera her cure sîstemê îstîsmarî yê ke bedena cinîye keno hedef, vindenê. Têkoşînê vera hişbir û fuhşî tena milê partîyanê sîyasîyan, sazgehan yan rêxistinanê sivîlan ser o nêeşkeno bêro verdayîş. No têkoşîn berpirsîyarîya hempare ya partîyanê sîyasîyan, rêxistinanê sivîlan, esnafan, keyeyan, rêxistinanê demokratîkan û şarê Farqînî ya.”
‘Ma do Farqînî pîya bipawê’
Mehmet Bakiroglu peynîya qiseykerdişê xo de dîyar kerd ke ganî tu kes yan beş vera nê problemî bêveng yan bêxem nêmano: “Seba ke ma Farqîn de piştîdayîşê komelkî gird bikerê, ciwananê xo bipawê û wayîrê ameyoxê xo vejîyê, ma venga heme beşan danê ke dorûverê têkoşînê hemparî de bibê yew. Ma reyna bi hawayêko eşkera vanê: Farqîn de ma do vera hişbir û sîyasetanê ke vera cinî û komelî yenê ramitiş bêveng nêmanê. Seba ke ameyoxê ciwananê xo, cuya cinîyan û erjanê komelkîyan ê şarê xo bipawê, ma do têkoşînê xo bi qerardarîye dewam bikerê. Ma do Farqînî pîya bipawê, pîya xurt bikerê û pîya wayîrê ameyoxê xo vejîyê; seba komelêk azad û demokratîk no berpirsîyarîya ma pêroyî ya.”
Eşkerayî bi çepikan qedîya.
