Amed – Ma Musîc Center ke endamê Platformê Şîyar Be yo, çarçewaya vera vilabîyayîşê madeyanê kungkerdiş û fuhuşî de, Amed de Gerok Ma reyde Atolyeya Muzîkî ya Gedeyan viraşt.
Ma Musîc Center ke endamê Platformê Têkoşînî Vera Kungkerdişî yê Şîyar Be yo, çarçewaya têkoşînî vera vilabîyayîşê madeyanê kungkerdiş û fuhuşî de, vizêrî, Sîteya Batikentî ya ke girêdayeyê qezaya Rezanî ya Amedî de, Gerok Ma reyde Atolyeya Muzîkî ya Gedeyan viraşt. Çalakîya de ke çarçewaya gamê “Wirzê” de ameybî dest pêkerdene, tehdîdanê polîtîkayanê şerê taybetî yê gede û ciwanan ser o bale ameye antiş. Çalakî de gedeyan reyde deyîrî ameyê vatene, kayî ameyê kaykerdene, potan ser o resimî ameyê viraştene û bi enstrumanan rîtîm ame girewtene. Gedeyê Sîteya Batikentî de eleqeyêko gird mojna.
Perwerdekaranê Ma Musîcî dîyar kerd ke waştişê înan o yo ke gede bi ziwan û kulturê xo gird bibê û kuçeyan de bêters, embazanê xo reyde kay bikerê. Perwerdekaranê Ma Musîcî, badê atolye, gede û roniştoxanê Sîteya Batikentî reyde tewrê kombîyayîşê şarî yê Platformê Şîyar Be bîyî. Kombîyayîşî de vilabîyayîşê madeyanê kungkerdiş, tîryak û fuhuşî ser o bel ameye antiş û ame waştiş ke her kes vera nê çîyî mîyanê têkoşînî de ca bigîro.
