Terefgirê Amedsporî do vera madeyê hişbirî, çeteyî û fuhuşî siba Amed de rayraşîyayîşêk virazenê. Terefgîran waşt ke seba komelêko azad û ciwananê azad ganî her kes vengê xo berz bikero.
Terefgirê Amedsporî do çarçewaya gamê “Wurzê” yê Platformê Têkoşînê Vera Madeyanê Hişbirî Şîyar Be siba saete 18.00î de rayîrê stadyumî yê qezaya Peyasî de vera madeyê hişbirî, çeteyî û fuhuşî rayraşîyayîşêk virazenê. Rayraşîyayîşî de çargrûbê terefgir ê Amedsporî yê bi nameyê Ultra Amed, Barîkat, Dîrenîş û Azadî ke yewîya xo awan kerdbi do pîya rayra şêrê.
Berpirsîyarê terefgiran derheqê rayraşîyayî de ajansê ma rê qisey kerd. Berpirsîyarê Ultra Amedî, Tîrêj Teke, yê Barîkatî Hîdayet Akboga, yê Dîrenîşê Mehmet Faruk Bagirtan û yê Azadîye Mahsun Yerlîkaya seba tewrbîyayîşî rayraşîyayîşî vengdayîşê terefgiran kerd.
‘Ma wazenê şarê ma, ma reyde bo’
Berpirsîyarê grûbê terefgiran dîyar kerd ke amancê înan o ewilîn no yo ke bi nê yewbîyayê newe reyde xebatanê hemparan gird bikerê, piştîdayîşî bidê Platforma Şiyar Be û wina qisey kerdê: “No rayraşîyayîşê ma vera şuxulnayîşê madeyê hişbirî û fuhuşî yo. Nê semedî ra ma do vengê xo berz bikerê. Seba komelêko azad û ciwananê azad, wa her kes vengê xo berz bikero. Problemê şuxulnayişê madeyê hişbirî ne tana problemê kesêkî yo, problemê komelê ma heminan o. Seba vernîgirewtişê nê xirabîyan, çi destê ma ra bêro ma do bikerê. Çar grûbê terefgiran qerar girewt û bîyî yew. Ma do bi na yewîye vera nê tehlukeyan rayraşîyayîşêk virazê. Wa şarê ma û ciwanê ma piştî bidê ma. Amancê ma no yo ke vera zêdebîyayîşê tîryakî Kurdîstan û Tirkîya de rayra şêrê. Ma wazenê şarê ma, ma reyde bo û ma pîya meydan de bê.“
