Konseya Rayberî ya KNKî derheqê hedîseyanê tewr peyênan ê Rojava yê Kurdîstanî de veng da heme hetan ke rayîr medê provakasyonan û wina vat: “Ganî heme hetî aram bibê, xo kontrol bikerê, aştîya komelkî bipawê û feydeyê pêroyî serê heme hesabanê bînan de bivînê. Cayê kaosî de, her kes seba afernayişê kanalêkê dîyalogî hewl bido.”
Konseya Rayberî ya Kongreya Neteweyî ya Kurdîstanî (KNK) derheqê hedîseyanê peyênan ê Rojavayê Kurdîstani ke peyê qetilkerdişê şehîd Sîpan Hiznî vejîyayî de eşkerayîyêk pare kerde.
Eşkerayîya KNKî ya seba hedîseyanê Rojava yê Kurdîstanî wina ya:
“Seba qetilkerdişê leşkerê Tugaya Hesekê ya Rojavayê Kurdîstani Sîpan Hiznî û hetê kiştoxan ra serê toranê medyaya dîjîtale de vilakerdişê vîdeoyê qetilkerdişê bi hawayêko hovane, mîyanê şarê ma de bîye sebebê şok û hêrsêko pîl. Çend şaristan û qezayanê Rojavayê Kurdîstanî de çalakîyê şarî ameyî viraştene. Beşdarê nê çalakîyan hedîseya hovane şermezar kerdî û kesanê berpirsîyaran ra persayîşê hesabî û edalet waşt.
Çîyo ke şaristanê Kobanê de çarçewaya nê hedîseyî de qewimîya û netîceya ci de hêzanê ke girêdayê Şamî û komanê Tirkîya hûmarêk çalakîkerî teqîb kerdî û tepiştî bî û waşt ke înan berê Zîndana Helebî. Dima zî hedîseyê Zîndana Kobanî û dormeyê aye de qewimîyayî ke netîceya înan de 8 kesan cuya xo vîndî kerde û 18 kesê bînî zî birîndar bîyî. Mîyanê înan de kesê ke rewşa înan giran a estê û no averşîyayîşêko zaf bi tehluke yo.
Na rewşe hewceyê vindertişêko bilez û berpirsîyarîyêka cîdî ya û sewbîna zî hewceyê cigêrayîşêko eşkera, xoser û bêhetî esta, seba ke rastîya hedîseyan bêro eşkerakerdene, berpirsîyarê hedîseyî bêrê dîyarkerdiş û her keso ke tesbît bibo beşdarê nê hedîseyî bîyo, înan ra hesab bêro persayene. Ma heme birîndaran rê weşîye û başbîyayîşêko bilez wazenê; seba şehîdan rehmet, seba keyeyan û şarê xo rê zî serweşîye wazenê.
Eynî wext de, ma venga şarê xo danê ke xo kontrol bikero û asta tewr berze de bi hîşyarî û berpirsîyarî têbigêrê, mal û milkê pêroyî û taybet bipawê û raye medê ke hêrs bibo sebebê kaos û xirabkerdişî yan zî pêrodayîşanê mîyanê xo. Çalakî û nerazîbîyayîş heqêko rewa yo la kaos çareserî nîya, pawitişê merdiman û mal û milkê înan berpirsîyarîyêka hempar a.
Heme tewir, ma vengdayîşê heme hetanê hukmatî û asayîşî yê eleqedaran kenê ke berpirsîyarîyanê xo bi temamî bigîrê serê milê xo, provokasyonan û şuxulnayîşî zorî ra dûrî vinderê. Şarê herême reyde bi ruhê berpirsîyarî û hurmetî de têkilî ronê û seba ke sebebê tansîyonî bêrê çareserkerdene rewşa ewroyêne ra dûrî bêro vindertene, kanalê cîdî yê dîyalogî abikerê.
Ma vengdayîşê risipîyan, şexsîyetanê komelî, partîyanê kurdan û berpirsîyanê herême kenê ke rolê xo yê rastîkenî kay bikerê. Ma nika qonaxêko hîsdare de yê û heme kesan ra wazenê ziwanê eqlî û famkerdişî aver berê. Provokasyon, kaos û şîdetî ra dûrî vinderê û vernîya her kesê ke wazenê rewşa hersî seba raşayîşê asayîşî û aramîya komelî bişuxulno bigîrê.
Seba naye, ma reyna waştişê xo yê seba eşkerakerdişê pêro rastîye û persayîşê hesabî yê her keso ke dîyar benê, newe ra teqrar kenê. Ma vengdayîşê heme hetan kenê ke aram bibê, xo kontrol bikerê, aştîya komelkî bipawê, mal û milkê pêroyî û taybetî bipawê û menfeetê pêroyî serê heme hesabanê bînan de bigîrê.”
