KNK seba temsîlîyetê kurdan ê hemverê Neteweyanê Yewbîyayeyan 3ê teşrîna verêne de Bruksel de konferansêko mîyanneteweyî virazeno û hedef keno ke vindertişêko kurdîstanî yo hempar û xerîteya rayîrî ya dîplomatîke bêrê viraştene.
Meseleya temsîlîyetê mîyanneteweyî yê kurdan hema zî meseleyanê tewr dergan ê tarîxê sîyasî yê kurdan ra yew a; kurdî ke badê Şerê Dinya yê Yewinî teberê sîstemê mîyanneteweyî de ameyî verdayene, nêzdîyê seserrêk o sînoranê dewletanê cîyayan de rewşêka parçebîyaye ya sîyasî û huqûqî de mendî. Kongreya Neteweyî ya Kurdîstanî (KNK) Kombîyayîşê xo yê Pêroyî yê 24. yê 6-7ê hezîrane 2026î de qerar dabî ke seba naskerdişê kurdan sey neteweyanê bînan û temsîlê înan ê sey çimdarî yê dezgehanê girêdayeyê NYyî – sey statuyê filistînijan – NYyî rê muracat bêro kerdene. Konferansê Brukselî do munaqeşe bikero ke no proses senî aver şêro.
Konseya Rayraberdişî ya KNKyî vengdayîşê xo de îfade kerd ke se serrî ra zêdeyêr o derheqê dîplomasî û temsîlê kurdan de zaf çî ameyo nuştene û vatene, zaf kombîyayîş û komîsyonî ameyî viraştene, la dîplomasîyêka bi qewetê ke şarê kurdan heq keno, nêameya ramitene; problemo tewr bingeyin ê vernîya ney no yo ke miletê kurdan asta mîyanneteweyî de wayîrê statuyêkê huqûqî nîyo: “Şarê Kurdîstanî nêzdîyê 60 mîlyonan nufus o, la dezgehanê mîyanneteweyîyan de nêyeno temsîlkerdene; NYyî de ke nêzdîyê heme neteweyî tede temsîl benê, nameyê miletê kurdan nêyeno wendene. Bi nameyê KNKyî Sekreterê Pêroyî yê NYyî Antonio Guterresî rê mektub zî ame pêşkêşkerdene, la na mesele bi çend kombîyayîş û mektuban çareser nêbena; KNK bi tena ney ra nêvejîyeno, hewceyê hemkarîyêka neteweyî û mîyanneteweyî est o. Ganî rayber, serekê partîyan, temsîlkarê rêxistinan û heme pêardoxê komelê Kurdîstanî asta berze de bêrê pêser û qeraranê hemparan bigîrê; bi kampanyayanê pêtan – sey kampanyaya îmzayan – şarê Kurdîstanî bikewo nê prosesî. Rojdemê konferansî bi temamî temsîlê miletê kurdan ê hemverê NYyî rê ameyo cîyakerdene; ma wazenê fikr û vindertişêko kurdîstanî bimojnê, vengê xo biresnê raya pêroyî ya dinya û program û çalakîyanê demê ameyoxî munaqeşa bikerê.”
Programê konferansî – 3ê teşrîna verêne 2026
10.00–10.05: Akerdiş û rêzgirewtiş
10.05–10.15: Qiseykerdişê akerdişî
10.15–10.30: Mesajê mêmanan
10.30–12.00: Pêşkêşkerdiş û perspektîfê pisporan
12.00–13.30: Qiseykerdiş û mesajê beşdaran
13.30–14.30: Mabênê werdî
14.30–16.30: Qiseykerdiş û mesajê beşdaran
16.30–18.00: Plankerdiş û beyannameyê netîceyî
Ca: Vrije Universiteit Brussel (VUB) – Campus Etterbeek – Gebouw Q: Aula QA, Nelson Mandela Hall, Bruksel
