Hollanda de bi sloganê “Bi Jineolojîye awankerdişê cuyêka azad û komunal” Konferansê Jineolojîye yê Ewropa yeno organîzekerdiş. Konferans do 16-18ê teşrîna verêne de bêro kerdiş; tede rolê Jineolojîye, tecrubeyê Ewropa û perspektîfê rêxistinbîyayîşê dewreyê newe do bêrê munaqeşekerdiş.
Konferans do bi organîzekerdişê endamanê Akademîya Jineolojîye û Komîteya Jineolojîye yê Ewropa bêro kerdiş. Babeta bingeyêne ya konferansî “Rolê Jineolojîye awankerdişê cuya demokratîke û komunale de” ya. Konferansî de do berardiş û destkewteyê xebatanê Jineolojîye yê des serranê peyênan yê Ewropa bêrê munaqeşekerdiş: têkoşînê azadîya cinîye, viraştişê zanayîşê alternatîfî, tecrubeyê cuya kolektîfe, perwerdeyê demokratîk û piştîdayîşê komunale. Sewbîna yeno pawitiş ke xeritaya rayîrî yê dewreyê newe bêro dîyarkerdiş.
‘Do rolê Jineolojîye awankerdişê komelî de bêro munaqeşekerdiş’
Organîzatoranê konferansî eşkerayîyêk daye. Eşkerayîye de ame vatiş ke tecrubeyê des serran yê xebatanê Jineolojîye yê Ewropa hetanê tarîxî, komelnasî û rêxistinî ra do bêrê erjnayîş. Goreyê eşkerayîye, perspektîfê komelê demokratîk û komunalî de rolê Jineolojîye yê awankerdişê komelî û modelê rêxistinbîyayîşê dewreyê newe do bêrê munaqeşekerdiş. Hem zî rayîrê averberdişê pratîkê Jineolojîye cuya rojane, perwerde, kultur, huner û rêxistinbîyayîş de do bêrê munaqeşekerdiş.
‘Hîrê rojan de hîrê roniştişê bingeyên û atolyeyî’
Goreyê eşkerayîye, programê konferansî do hîrê roniştişanê bingeyênan û hewt atolyeyan ra bêro meydan. Roja verêne de do roniştişê bi sernameyê “Jineolojî, zanistê awankerdişê nasnameyê cinîye bingeyê azadîye ser o” bêro organîzekerdiş. Badê teştareyî zî hewt atolyeyî do bêrê viraştiş. Babetê atolyeyan nê yê: modelê rêxistinbîyayîşê Jineolojîye yê Ewropa, pedagojîya Jineolojîye, keye, vurîyayîşê komelkî û vurîyayîşê camêrdî, vîrê cinîye û xoverdayîşê kulturî, cinîyê ciwanî û Jineolojî, cuya komelkîye ya bingeyê ekolojîkî ser o û Jineolojî, muhîmîya xebatanê çapemenî û weşanî û rêxistinkerdişê înan.
‘Do azadîkerdişê zanayîşî bêro munaqeşekerdiş’
Roja dîyine de do bi sernameyanê “Awankerdişê komelê demokratîk û komunalî” û “Komelîkerdişê zanayîşî û azadîkerdişê zanistî tesîranê kolonyalîstan ra” di roniştişê bingeyênî bêrê viraştiş. Roniştişo dîyine de do rolê Jineolojîye yê prosesê vîyartişî bêro munaqeşekerdiş; no proses Îdeolojîya Xelasîya Cinîye ra ver bi sîyasîbîyayîşê têkoşînê xelasîya cinîye şono. Roniştişo hîrêyine de zî do netîceyê metodanê pedagojîkan yê alternatîfan bêrê erjnayîş ke Jineolojîye des serran ra zêdeyêr de aver berdî.
‘Do netîceyê atolyeyan bêrê munaqeşekerdiş û qerarî bêrê girewtiş’
Beşê peyênî yê konferansî de yeno pawitiş ke netîceyê hewt atolyeyan bêrê parekerdiş û qerarê hemparî bêrê girewtiş. Munaqeşe û qerarê hîrê rojan do eşkerayîya peyêne ya konferansî de ca bigîrê û konferans do bi weşanayîşê na eşkerayîye biqedîyo.
