Centre for Kurdish Affairs netîcenameyê Konferansê Haştîye û Entegrasyonê Demokratîkî eşkera kerd. Netîcenameyî de ame waştene ke rastkerdişê ke ser o pêameyîş beno, bi huqûq û dezgehanê demokratîkan bêrê garantîkerdene.
Netîcenameyî de ame vatene ke qedîyayîşê şîdetê çekdarî firsendêko tarîxî virazeno, la tena xo bi xo haştî nîyo. Ganî problemê sîyasî, huqûqî, komelkî, kulturî û ekonomîkî yê ke pêkewtiş ardo meydan û dewam kerdo, çareser bibê.
Netîcenameyî de mesajê Rayber Apoyî yo ke Îmrali ra şawitbi zî ame vîrardene. Ame dîyarkerdene ke muhîm o ke Rayber Apo ê şertan de ke tede şêno rasterast dîyalog virazo, beşdarê prosesêkê muzakereyî bibo.
Netîcenameyî de ame dîyarkerdene ke entegrasyono demokratîk asîmîlasyon nîyo; ganî kurdî bieşkê nasname, ziwan û kulturê xo bipawê û îradeyê xo yo sîyasî bi rayîrê dezgehanê demokratîkan bîyarê ziwan. Seke warê çekan teng beno, ganî warê sîyasetê demokratîkî hîra bibo. Seba ke hukmat û şertê sîyasî eşkenê bivurîyê, ganî rastkerdişê ke ser o pêameyîş beno, bi huqûq bêrê garantîkerdene.
Netîcenameyî de ame waştene ke xebatê raştî û edaletî heta peymana haştîye nêrê taloqkerdene; vindîbîyayîş, qetlê faîlmeçhulî, vengkerdişê dewan û îşkenceyî bêrê tehqîqkerdene. Ame vatene ke ganî cinî aktorê awankerê haştîye bibê û komel seyrkerê haştîye nêbo.
Centre for Kurdish Affairs venga hukmatê Îngilîstanî da ke derheqê prosesê entegrasyonî yê Sûrîye de mekanîzmayê têkilî û piştîdayîşî awan bikero. Dezgehî pêşnîyaz kerd ke heyetêko xoser ê çimdarî yo ke bingeyê ci Îngilîstan de bo, bişawîyo Tirkîya.
Dezgehî dîyar kerd ke serra 2027î de konferansêko taqîbkerdişî do bêro organîzekerdene. Netîcename bi nê prensîbî qedîya: “Eke komel netîceyanê şerî bar keno, ganî awankerdişê haştîye de zî wayîrê vatişêkî bibo.”
