Rayberê Şarê Kurdî Abdullah Ocalanî Konferansê Jineolojîye yê Ewropa rê mesajêk erşawit û wina vat: “Wa no konferans hem vîyarteyê hem zî ameyoxê jineolojîye bierjno. Wa estbîyayîşê cinîyan raşt tarîf bikero, zanayîşê cuya azade gird bikero. Projeyê mi yo ke nêm mendo, do bi hêzê nê munaqeşeyan temam bibo. Bawerîya mi bi şima temam a.”
Hollanda de Konferansê Jineolojîye yê Ewropa yeno organîzekerdene. Rayberê Şarê Kurdî Abdullah Ocalanî konferansî rê mesajêk erşawit û mesaj konferans de ame wendene. Mesajê Abdullah Ocalanî wina yo:
“Embazê erjayeyî;
Pawitoxê fikr û keda Jineolojîye, awankerê cuya azade. Mi de cigêrayîşêk est o ke domanîye ra nat zerrîya mi de yo: dîyayîşê estbîyayîşê azad ê cinîyan û afirnayîşê qadêk ke layiqê înan bo. No cigêrayîş bi girewtişê embazanê mi yê keynan kaykerdişan ra û bi şîyayîşê waya mi bi yew ciwal savarî xorîn bî. Xoverdayîşê bêvengî yê cinîyanê dewan û berzbîyayîşê ey yê sewîyeya îlahe de mi dî ke xelasî mumkun a; ez zî na bawerîye dima şîya. Mi tim rêçê înan taqîb kerd. Çunke mi zanayêne ke birîna komelî ya tewr xorîne koleyîya cinîye bîye. Bê ke na bêro fehmkerdene, ne azadî, ne seyyewbînî, ne zî demokrasîyêka raştikêne mumkun bîye.
Wexto ke mi Jineolojî ronaye, amancê mi tena viraştişê termêk nêbî. Tarîfkerdişê estbîyayîşê cinîye bi raştîya aye ya tarîxî û komelkîye newe ra, vetişê aye çîbîyayîşî ra û kerdişê aye fîîlî ra karê ma yo tewr muhîm bî ke do tarîxî rê bimano. Mi waşt ke zanayîşê îlaheyan û tarzê cuya cinîmerkezî ya dewreyê Neolîtîkî ke şaristanîya patrîarkal hezaran serran ra nat ser o nimitbî, newe ra bîyarê erdî ser. Xencero ke piştê komelî de bî, koleyîya cinîye bî; bê ke no xencer bivejîyo, tu problem nêeşkayêne çareser bibo. Jineolojî sey zanistêk no xencer tarîf kena, cayê ey ra vejena û erzena û herundeya ey de zanayîşê cuya azade afirnena.
Kedê ke heta ewro bi nameyê Jineolojîye ameyî dayene, çîyê ke ameyî nuştene, munaqeşekerdene û rêxistinkerdene mojna ke no zanist eynî wextî de tarzêk cuye yo. Seba perspektîfê cinîye bî sey nefesêk. Pakkerdişê nasnameyê cinîye unsuranê cinsîyetperestan ra û afirnayîşê qadêk fikr û çalakîye ya xo, deyn û wezîfeyo tewr muhîm bî ke do tarîxê merdimîye rê bimano. Nê bîyî qadê bingeyênî yê meşgulbîyayîş û têkoşînê Jineolojîye. Vatişê ‘Merdim sey cinî nêyeno dinya, dima ra beno cinî’ muhîm o. La ganî no estbîyayîş ne sînoranê ke camêrd ferz keno de bi hêzê cewherî yê cinîyan bêro ca. Coka ma vat ke ganî her cinî bibo wayîrê odayêk xo, vengê xo û zanayîşê xo.
Sey camêrdêk nê prosesî de mi xo tim cipersayîşan ra vîyarna û newe kerd. Ma naye rê zî manayêk bar kerde; ma kerd hedef ke bi vurîyayîşî camêrdîya serdeste ya seyan serran ra xelas bibê. Mi vat ke qeydeya bingeyêne ya sosyalîzmî azadîya cinîye ya. Çunke krîter sosyalîstbîyayîşo raşt ê camêrdêk, cinîye reyde awankerdişê cuyêka raşte, seyyewbîne û azade ya. Zaf tecrubeyanê sosyalîstan ê dinya de na qeyde kêm mende. Na kêmanî bîye sebeb ke şorişî nêm bimanê. Mi cehd kerd ke na kêmanî ra bivîyara û layiqê îlaheyan biba. Vurnayîşê camêrdî û azadkerdişê ey cinîye reyde mi rê bî wezîfeyêko ke caverdayîşê ey nêbeno.
Ewro verê ma de prosesêko newe est o. Hende ke prosesêko muzakereyê sîyasî yo ke aştî û demokrasî cigêreno, hende zî prosesêko komelkî yê newe ra awankerdişî yo.
Cinî do nê awankerdişî rê pêşengîye bikerê. Çunke nêmeyê gamanê muhîman ra zêdeyêr ke heta ewro ameyî bidestkewtene bi kede, xoverdayîş û aqlê cinîyan ameyî ca. Ewro ra pey zî do wina bibo. Ganî jineolojî bibo bingeyê zanistî û îdeolojîkî yê na pêşengîye.
Her wext ke şima hewcedarî bivînê, ez do şima reyde biba, şima reyde bifikirîya û berardiş bida. Çunke mi rê manaya cuye, cuya azade ya cinîyan de şênber bena.
Wa no konferans hem vîyarteyê hem zî ameyoxê jineolojîye bierjno. Wa estbîyayîşê cinîyan raşt tarîf bikero. Wa zanayîşê cuya azade gird bikero. Projeyê mi yo ke nêm mendo, do bi hêzê nê munaqeşeyan temam bibo. Heta peynî ez bi şima bawer a. Xo vîrî ra mekerê ke ez tim şima reyde ya.
Bi hesret û heskerdişêko bêpeynî.
Abdullah Ocalan
Îmrali”
