Rayberê Şarê Kurdî Abdullah Ocalan, mesajê xo seba 24. yê Heyetê Pêroyî yê KNK’yî rê erşawit û wina vat: “Xurtkerdişê cigêrayîşê Kurdan ê seba yewîya demokratîk, pawitişê destkewteyî netewîye û bihêzkerdişê erjanê komelo demokratîk berpirsîyarîya ma hemine yo hempar o.
Rayberê Şarê Kurdî Abdullah Ocalan, mesajêk 24. yê Kongreya Neteweyî ya Kurdîstanî (KNK) rê erşawit.
Rayberê Şarê Kurdî Abdullah Ocalan mesajê xo de wina vat:
Welatperwerê erjayeyê, temsîlkarê qedirberzî, mêmanê birûmetî;
Verê her çî ez 24. yê Heyetê Pêroyî yê Kongreya Neteweyî ya Kurdîstanî bi hîsanê xo yê tewr zerrîye ra silam kena û na pêvînayîşê şima yo bi mana û 27 serrîya KNK’yî pîroz kena. Awankerdiş û sazgehbîyayîşê Kongreya Neteweyî ya Kurdîstanî (KNK) de, mi zî hetê xo ra ked û piştî da. Hepîsxane bo zî, goreyê îmkanan, mi xebatê şima teqîp kerd û ge-ge zî pêşnîyazê xo şima rê erşawitê.
Her nîqaşêk ke ameyox, yewîya neteweyî, heqê demokratik û îradeyê hempar ê şarê kurdî ser o yene kerdiş, rayîrşîyayîşo tarîxî yê şarê ma de wayîrê cayêko muhîm de yê.
Şarê kurdî ewro qonaxêka zaf muhîm ê tarîxî ra desrbas beno. Kurdî bi seserran polîtîkayanê înkar, îmhakerdiş, perçekerdiş û bêstatu reyde rîbirî mendê û vera heme zextan îradeyê xo yê azadîye pawito, qabîlîyetê xo yê sîyasî aver berdo û bîyî yew hêzê komelkî ê muhîmî yê Rojhelatê Mîyanenî. Êdî mumkun nîyo ke Rojheletê Mîyanên kurdî nêrê hesibnayîş û nêrê naskerdiş. Rojhelatê Mîyanên de bê kurdan vurîyayîş mumkun nîyo.
Na rastîye seba kurdan berpirsîyaranê newe ana. Ewilî, averşîyayîşê dîyalog û xebatê hemparî mîyanê kurdan de wezîfeyêko muhîm o. Yewîya neteweyî, tena bi keda hempar ê hêzanî sîyasî, roşnvîr, cinî, ciwan û heme dînamîkê komelî reyde mumkun a.
Yewîya demokratîke, çinîkerdişê cîyayîyan nîya, zemînêko demokratîk ser o rayîrberdişê înan o. Amanc no yo ke babetanê neteweyî ê hemparan de helwest û îradeya hempar bêro nîşandayîş, destkewteyanê neteweyî bêrê pawitene û xebitnayîşê kurdan vera yewbînan bêrê astegkerdene.
Nê semedî ra, averşîyayîşê diyalog û muzakereyan ê mabenê kurdan muhîm o. Rayîrê vîyartişê nakokîyan şer nîyo, qiseykerdiş, nîqaş û çareserîyê hempar ê. Fikrê kongreyêka neteweyî ya demokratîk zî ganî sey cewabê nê lazimîyan bêra vînayîş.
Eynî wextî de, ameyoxê şarê kurdî bi yewîya neteweyî û komelo demokratîk rê girêdayeyo. No famkerdiş, çareserîya probleman; siyaset, huqûq û muzakereyê demokratîk reyde mumkun beno û cuya hempar, seyyewbînî û demokrasî pawena.
Ewro hewcedarîya ma, rihê yewîya neteweyî, piştîdayîşê demokratîk bi şaranê Rojhelatê Mîyanên rê û ewnîyayîşêko hempar ê ameyoxî ya. Coka xurtkerdişê yewîya demokratîk, pawitişê destkewteyê neteweyî û bi hêzkerdişê erjanê demokratîk berpirsîyarîya me hemine ya.
Bi nê hîsan û fikran ez kombîyayîşê şima selam kena û hêvî kena ke netîceyê nê xizmetê yewîye, azadîye û ameyoxo demokratîk ê şarê ma bikero.
Ez serkewtiş wazena û heme beşdaran bi rêz silam kena.
