Çarçewaya kampanyaya “Abdullah Ocalanî rê azadî, meseleya kurdan rê çareserîya sîyasîye” de 50 welatan ra 845 îmzeyî ameyî arêdayîş. Piştîdayîşo mîyanneteweyî ke 109 xelatgirê Nobelî zî tede yê, resa Konseyê Ewropa.
Peynî de 620 îmzekaranê 29 welatan Komîteya Wezîran a Konseyê Ewropa rê mektubêk erşawit. Hemverfekê Têkilîyanê Teberî ya Kongreya Neteweyî ya Kurdîstanî (KNK) Nîlufer Koçe babete ANF rê erjnaye.
‘Azadîya Rayber Apoyî tena prosesî ra girêdaye nîya, heqêko bingeyên û huqûqî yo’
Nîlufer Koçe Prosesê Aştîye û Komelê Demokratîkî de îşaret kerd gamanê ke hetê kurdan ra ameyê eştiş. Aye dîyar kerd ke helwesta dewlete ya nêeşkerakerdîye û hêdîye derheqê gamanê şênberan de dewam kena. Aye va ke 27ê sibate ra nat seba averşîyayîşê prosesî zaf pêşnîyazî ameyê pêşkêşkerdiş. Nîlufer Koçe qetî kerd ke seba averşîyayîşê prosesî ganî statuyê Rayber Apoyî eşkera bibo.
Nîlufer Koçe îfade kerd ke munaqeşeya derheqê azadîya Rayber Apoyî de ganî tena Prosesê Aştîye û Komelê Demokratîkî ra girêdaye nêbêro dîyayîş û nêbêro vatiş. Goreyê aye proses na babete de argûman û firsendêko sîyasî pêşkêş keno la mesele wayîrê hetêkê hîna hîrayî yê huqûqî û sîyasî ya.
Nîlufer Koçe wina va: “Eke no proses nêbîyêne, ganî Rayber Apo azad nêbîyêne? Goreyê mi tîya de prosesî ra wetêr meseleyêk esta. Xora remnayîşê ey û tepiştişê ey ê bêedaletî yo 27 serran ê Îmrali bi xo problem o. Tepiştişê rayberê şarêk, merdimêko ke demokrasî û azadîye ra teber tu çî nêwazeno, bi xo bêedaletî ya.”
‘Konseyê Ewropa bi nêrînê şerî hereket keno û caardişê mesulîyetan de bêwaştiş o’
Nîlufer Koçe bale ante hetê huqûqî yê na bêedaletîye ser û qerarê Dadgeha Heqanê Merdiman a Ewropa (DHME) yê serra 2015î ard vîr. Aye dîyar kerd ke herçiqas serrî qerarê DHME’yî ser ra vîyartê zî qerar hema nêameyo caardiş. Aye wina dewam kerd: “No helwestêko sîyasî yo. Mesulîyetê Komîteya Wezîran a Konseyê Ewropa est o û ganî Konseyê Ewropa huqûqê xo bikero feîleyet ke Tirkîya mesulîyetê qerarî bica biyaro.”
Hemverfekê Têkilîyanê Teberî ya KNK’yî Nîlufer Koçe ard ziwan ke helwesta Konseyê Ewropa ya derheqê Rayber Apoyî de dewamê xeta polîtîke ya verêne ya nêzdîbîyayîşê meseleya kurdan a. Aye dîyar kerd ke Prosesê Aştîye û Komelê Demokratîkî têmîyanekîyê nê nêzdîbîyayîşî hîna şênber kerdê. Aye wina va: “Komîteya Wezîran ke dezgehê sîyasî û caardişî yê Konseyê Ewropa ya, hema bi fehmê ‘Şerê mabênê Tirkîya û kurdan dewam keno’ hereket kena. Na sazgeh seba ke Tirkîya sey hevalbend yan zî partnerê xo vînena, hetê caardişê mesulîyetanê xo yê huqûqîyan ra bêwaştiş hereket kena.”
‘Ganî Konseyê Ewropa polîtîkaya xo ya verêne bivurno û piştî bido prosesê aştîye’
Nîlufer Koçe ard vîr ke prosesêko newe yê aştîye rojeve de yo û Rayber Apo seba aştîye û komelê demokratîkî vengdayîşan keno. Aye dîyar kerd ke ganî Konseyê Ewropa zî nê şertanê neweyan bivîno û helwesta xo newe ra biewnîyo. Nîlufer Koçe qiseykerdişê xo wina dewam kerd: “Çiqas ke yeno dîyayîş, Konseyê Ewropa hema zî polîtîkaya xo ya kurdan a verêne de îsrar keno. Kurdî û tirkî êdî şer nêkenê, coka Komîteya Wezîran a Konseyê Ewropa sey hetêkê hîrêyinî hereket kena ke na têmîyanekîye ra îstîfade keno.” Nîlufer Koçe dewamê erjnayîşanê xo de wina va: “Meseleya kurdan rewşêka seserrîye ya. Wexto ke her di hetî şer kenê, hetê hîrêyin şa beno. Aseno ke Konseyê Ewropa hema rolê hetê hîrêyinî gêno. Halbuke Tirkîya de tirkî û kurdî êdî pratîk de mîyanê şerêkê eskerî de nîyê. Hetê hîrêyin çira hema sey ke di hetî şer kenê kewena pozîsyon?”
Hemverfeka Têkilîyanê Teberî ya KNK’yî Nîlufer Koçe da zanayîş ke Prosesê Aştîye û Komelê Demokratîkî ferz keno ke na sazgeh nêzdîbîyayîşê xo yê hetanî nikayinî newe ra biewnîyo. Aye dîyar kerd ke piştîdayîşo ke kampanyaya îmzeyan a mîyanneteweyîye rê ame dayîş, tena dorûverê ke fikranê Rayber Apoyî qebul keno ra sînordar nîyo. Nîlufer Koçe va ke mîyanê kesanê ke kampanya îmze kerda de tayê merdimî est ê ke fikrê Rayber Apoyî hetê îdeolojîk ra qebul nêkerdê. Aye qetî kerd ke caardişnêbîyayîşê qerarê DHME’yî nê dorûveran de zî bîyo cayê nerazîbîyayîşî.
‘Ganî Konseyê Ewropa seba aştîye helwestêka qerardare bimojno’
Nîlufer Koçe ard vîr ke Konseyê Ewropa û DHME 40 serranê peyênan de derheqê binpaykerdişanê heqanê merdiman ê Tirkîya de zaf dosyayan reyde ribirî mendê. Aye wina va: “Tena kurdan ney, muxalifanê Tirkîya zî muracatê nê mekanîzmayan kerd.” Nîlufer Koçe dîyar kerd ke şertê aştîye yo ke nika vejîyayo werte, Konseyê Ewropa rê mesulîyet dano. Aye qetî kerd ke ganî Komîteya Wezîran helwestêka winasîye bimojno ke piştî bido aştîye û qerarê DHME’yî yê derheqê Rayber Apoyî de bido caardiş.
‘Vengdayîşê wayîrvejîyayîşê komelkî’
Nîlufer Koçe îfade kerd ke lazim o merheleyêka newe ya kampanyaya îmzeyan a mîyanneteweyîye dest pêbikero. Aye bale ante kombîyayîşê Komîteya Wezîran a Konseyê Ewropa ser ke 1-3yê kanûne de do bêro kerdiş. Aye wina va: “Nê kombîyayîşî de rewşa Rayber Apo û dosyaya caardişê qerarê DHME’yî do bêrê rojeve. Na dosya ke destê Komîteya Wezîran de ya, seba vurnayîşanê qanûnîyan ê Tirkîya muhîm a. Ganî kampanyayê mîyanneteweyî dewam bikerê. No tena bi îmze û kampanyayanê mîyanneteweyîyan nêmano, ganî heme parçeyanê Kurdîstanî de beşê komelkî wayîrê nê prosesî vejîyê.”
‘Mucadeleyê azadîye de wezîfe û mesulîyetê komelkî lazim o’
Nîlufer Koçe kişta muhîmîya karanê dîplomatîkan ê DEM Partî yê Parlamentoyê Ewropa de ard ziwan ke verê kombîyayîşê Komîteya Wezîran a Konseyê Ewropa yê aşma kanûne de tena partîyê sîyasî ney, muhîm o ke heme beşê komelkî bikewê hereket. Na çarçewa de Nîlufer Koçe venga Têgêrayîşê Cinîyanê Kurdan, Yewîya Wendekaranê Kurdîstanî û organîzebîyayîşanê cîyayan ê komelkîyan da. Aye dîyar kerd ke ganî tim Komîteya Wezîran rê mektubî bêrê erşawitiş, waştişî bi rayîrê e-postayî bêrê dayîşzanayîş û kampanyayê medyaya dîjîtale dewam bikerê. Goreyê aye nê hewldayîşî kampanyaya îmzeyan ra wetêr do bibê manaya wayîrvejîyayîşê komelkî yê mucadeleyî û îsrarê Rayber Apo yê seba aştîye.
‘Caardişê heqê hêvîye do herême de hêvîyêka newe biyaro’
Hemverfeka Têkilîyanê Teberî ya KNK’yî Nîlufer Koçe qetî kerd ke caardişê heqê hêvîye û virazîyayîşê azadîya fîzîkî ya Rayber Apo do herême de hêvîyêka newe biyaro û welatanê cîyayan ê Rojhelatê Mîyanênî ser o tesîr bikero.
