Di civîna gel a taxa Xaçortê ya Wanê de Hevserokê Giştî yê DBPê Keskîn Bayindir diyar kir ku ji bo serkeftina pêvajoya aştiyê Abdullah Ocalan û tevgerê gavên pêwîst avêtine û destnîşan kir ku êdî dema gav avêtinê ya dewlet û hikûmetê ye.
Partiya Herêmên Demokratîk (DBP) a Wanê bi dirûşma “Em Aştiyê bi gel re ava dikin” li taxa Xaçortê ya navçeya Rêya Armûşê ya Wanê bi tevlibûna hevserokê xwe yê giştî Keskîn Bayindir civîna gel li dar xist. Civîn ji aliyê welatiyan ve rastî eleqeyeke mezin hat û welatiyan di civînê de dirûşmên “Bijî Serok Apo”, “Bê Serok jiyan na be” berz kirin.
‘Ev pêvajo dê di bin pêşengiya Abdullah Ocalan de bigihîje serkeftinê.’
Keskîn Bayindir di civînê de bal kişand ser pêvajoya aştiyê û got: “Ev sal û nîv e ku ji aliyê Rêberê Gelê Kurd Abdullah Ocalan ve pêvajoyek hatiye destpêkirin. Ev pêvajo dê di bin pêşengiya Abdullah Ocalan de bigihîje serkeftinê. Pêvajoya heyî dê qedera gelê Kurd biguherîne. Bi sedan sal e ku Kurdan girtîgeh, mîşextî, girtin û êş dîtin, lê êdî qedera vî gelî nabe zindan, sirgûn, girtin û mirin.”
‘Daxwaza gelê Kurd azadiya Rêberê Gelê Kurd Abdullah Ocalan e’
Keskîn Bayindir destnîşan kir ku gelê Kurd ji 7 salî heta 70 salî hişmendiyeke mezin nîşan dide û daxwazên bingehîn ên gel bi van gotinan rêz kir: “Gelê Kurd her tiştî aşkere dike, daxwaza wan a yekane zimanê zikmakî ye, statûya wan e, parastina kevneşopî û rûmeta wan e û her wekî din azadiya Rêberê Gelê Kurd Abdullah Ocalan e. Di aliyekî vê pêvajoyê de Rêberê Gelê Kurd û tevger heye, di aliyê din de jî dewlet heye. Birêz Abdullah Ocalan û tevgerê bi gavên ku avêtin, ji tevahiya cîhanê re peyam dan û gotin ‘em di vê pêvajoyê de micid in û em bi biryar in ku vê pêvajoyê bigihîjînin serkeftinê’. Ji ber vê yekê, êdî lîstik qediya ye, dema gav avêtinê ya dewlet û hikûmetê ye.”
Piştî civînê polîsan bi gaz û fîşekên plastîk êrişî girseyê kir. Gel bi dirûşman bersiva polîsan da û piştî belavbûna girseyê û çûyîna polîsan rewş asayî bû.
