Karkerên hesin ên înşaetê yên li Amedê, li dijî bihabûna şert û mercên giran ên xebatê daxuyanî dan û wiha gotin: “Daxwaza me ne îmtiyaz e, mafê keda me ye.”
Karkerên hesin ên înşaetê li Amedê ji ber şert û mercên giran ên kar û xebatên wan, ji bo daxwazên xwe yên heqdest û mafên karkeriyê li Parka Sumerê ya li navçeya Yenîşehîr a Amedê daxuyanî dan. Gelek saziyên sivîl jî tev li daxuyaniyê bûn.
Li ser navê karkerên hesin metna daxuyaniyê ji aliyê Kadrî Bozan ve hate xwendin.
Di daxuyaniyê de hat ragihandin ku ji 1ê Tebaxa 2026an pê ve heqdestê wan ê rojane bûye 3 hezar lîre û bang li hemû karkeran hat kirin ku di binê vê heqdestê de nexebitin.
Kadrî Bozan diyar kir ku ji ber enflasyonê, zêdebûna kirêyan û bihabûna pêdiviyên bingehîn êdî nikarin malbatên xwe xwedî bikin û ev tişt anî ziman: “Salek berê heqdestiya me 2 hezar û 200 lîre bû û zêdekirina 300 lîreyî ya ku ji bo îsal hatiye pêşniyarkirin têrê nake.”
Kadrî Bozan di daxuyaniyê de bal kişand ser girîngiya ewlehiya kar û wiha domand: “Karê hesin ked, hostayî, sebir û berpirsiyariyeke mezin dixwaze. Gava hostayek dixebite, divê di hişê wî de ne fikarên debarê, ewlehiya kar hebe û îhmalkariyeke biçûk dikare bibe sedema karesatan. Daxwaza me ne îmtiyaz e, mafê keda me ye.”
Her wiha Kadrî Bozan ragihand ku ji 1ê Tebaxa 2026an pê ve, heqdestê rojane ya hostayên hesinî yên li Amedê wekî 3 hezar lîre hatiye diyarkirin û bi bangkirina hemû karkeran dawî li daxuyaniyê anî: “Bêyî tavîzdayînê li vê biryarê xwedî derkevin û di binê vê biryarê de nexebitin. Banga me li şîrket û taşeronan jî bi pêşniyarên kêm nirxa kedê nexînin û rêzê li mafê karkeran bigirin. Heta ku mafê keda me bê radestkirin em ê têkoşîna xwe berdewam bikin.”
