Amed – Karker û kedkarên ku tev li pîrozbahiya 1ê Gulanê bûn diyar kirin ku şer bandora xwe li jiyana wan dike û lewma ew piştgiriyê didin pêvajoyê û ji bo pêvajo li pêş bikeve ji destê wan çi were dê bikin.
Li seranserî Kurdistanê û cîhanê pîrozbahiyên 1ê Gulanê hatin lidarxistin û bi milyonan karker daketin meydanan. Karker û kedkaran li her meydanê ev roj bi coş pîroz kirin. Karker, kedkar, karmend, jin, ciwan, teqawîd ji her beşên civakê bi milyonan kes li meydanan daxwazên xwe anîn ziman. Li bakurê Kurdistanê û bajarên Tirkiyeyê jî îsal bandora pêvajoya “Banga Aştiyê û Civaka Demokratîk” li ser pîrozbahiyên 1ê Gulanê xwe da nîşandan. Li Amedê 1ê Gulanê li Meydana Îstasyonê hat pîrozkirin. Karker û kedkarên ku tev li mitîngê bûn ji ajansa me re axivîn û diyar kirin ku şer bandorê li ser jiyana wan, aboriya wan dike û ew dixwazin pêvajoya hatiye destpêkirin li pêş bikeve.
‘Em piştevaniya banga birêz Abdullah Ocalan dikin’
Hanîfê Kardaş a karker diyar kir ku 1ê Gulanê ji bo wan roja serhildanê ye û wiha axivî: “Her dem dixwazin kedkaran, karkeran bi birçîbûnê bielimînin. Di aliyê aborî de gel zehmetiyên pirr zêde dikişîne. Ji bo vê em îro hatin mitîngê. Ji bo aboriya me çi destê me were em ê bikin. Em li pişt banga birêz Abdullah Ocalan in, em piştgiriyê didin banga wî. Çi destê me karkeran were ji bo pêvajo li pêş bikevê em ê bikin. Divê êdî em qadên 1ê Gulanê bikin qadên azadiyê. Em dibêjin bila êdî dewlet dest ji polîtîkayên qirêj berde. Tenê rêyek maye ew ji aştî û demokrasî ye. Divê dewlet ji bo bangê gav biavêje. Bi têkoşîna gelê Kurd ev pêvajo wê bigihîje encamê.”
‘Banga aştiyê bangeke pîroz e’
Endama Odeya Bijîşkan a Amedê Elîf Tûran diyar kir ku ew vê rojê li hemû karker û kedkaran pîroz dikin û wiha got: “Bi kedeke mezin em gihîştin îro. Me xwîn rijand ku heta em gihîştin vê astê. Yên ku di vê rêyê de ked dane em wan bi rêzdarî bibîr tînin. 1ê Gulanê roja qîrkirina daxwazan e. Bihabûnek zêde heye, karker di bin vê bihabûnê dieciqin. Em dixwazin di kargehên xwe de azad kar bikin. Banga aştiyê bangeke pîroz e. Em vê bangê di cih de dibînin. 40 sal in şer li ser vê erdnîgariyê berdewam dike. Di van deh salên dawî de me carek din bandora şer dît. Di encama vî şerî de gelek kes bi rêya KHKyan ji karê xwe hatin derxistin. Em dizanin ku aştî hebe şert û mercên jiyanê dê baştir bibin. Aştî wê bandora xwe li ser karkeran jî bike. Em her dem dibêjin derûniya baş ne tenê di aliyê fizikî de ye. Her dem şer bandorê li ser derûniya civakê dike. Em hêvî dikin ku ev pêvajo bigihîje encamê. Em dixwazin siberoja me bi aştiyê derbas bibe.”
‘Divê dewlet gav biavêje’
Karkerê bi navê Alî Riza Yavûz jî da zanîn ku ew îro ji bo mafê xwe hatine qadê û wiha axivî: “Ji bo aştiyê û aramiyê em hatin qadê. Em hêvî dikin ku 1ê Gulanê ji bo tevahî cîhanê aştiyê û aramiyê bîne. Rêberê Gelê Kurd Abdullah Ocalan ji bo tevahiya cîhanê di 27ê Sibatê de bang kir. Em dibêjin aştî û aştî. Em ji dewletê re dibêjin heke hûn gavan neavêjin aştî jî nabe. Divê dewlet gavan biavêje.”
‘Em ê mil bidin vê pêvajoyê’
Orhan Kaya yê karker jî diyar kir ku îro ew ji bo pîrozbahiyê hatiye mitîngê û got: “1ê Gulanê ji bo karkeran rojek gelek girîng e. Hemû karkerên cîhanê bi coş îro pêşwazî dikin. Em bawerin îro ji bo karkeran dê bibe bersiva gelek tiştan. Aştî ji bo hemû cîhanê gelek girîng e û pêwîst e. Ji bo wê em ê mil bidin vê pêvajoyê.”
‘Em hêvîdarin ku ev pêvajo bigihîje astek baş’
Menav Tarhan ê karkeriya şofêriyê dike da zanîn ku 1ê Gulanê gelek girîng e û ev yek anîn ziman: “Li welatekî mafê mirovan tune be em nikarin behsa mafên kedkaran bikin. Di serî de divê em vê rast bikin. Her roja diçe em li vî welatî ji demokrasiye dûr dikevin. Îro ji bo roja kedkaran em hatine vir, sibê jî em ê ji bo demokrasiyê li qadan bin. Em dixwazin vê sîstemê biguherînin. Heta ku li tevahiya cîhanê mafê mirovan neyê parastin, dê mafê kedkaran jî tune be û were xwarin. Em hêvîdarin ku ev pêvajo bigihîje astekî baş. Lê em ji dewletê bawer nakin. Em naxwazin ciwan bimirin. Divê dewlet gav biavêje. Em dixwazin li ser rastiyê ev pêvajo were birêvebirin.”
