Hevşaredara Şaredariya Peyasê Berîvan Sîncar di vekirina Kargeha Hunerê ya Yektayê de axivî û got: “Eger huner û çanda Kurdî hîn jî zindî ye, ev bi saya Halîl Dag, Hozan Serhad û Delîla ye û em mînettarên wan in. Vekirina kargehê ji bo kesên ku ciwanan ber bi hişbir, fihûş û rêyên xerab ve dikşînin, bersiveke.”
Şaredariya Peyasê bi armanca mezinkirina hêza hunerê, zêdekirina hilberîn û piştevaniyê bi hev re li taxa Hûzûrevleriyê ya Peyasê ya Amedê Kargeha Hunerê ya Yektayê vekir. Hevşaredarên Peyasê Berîvan Gulşen Sîncar, Cengîz Dundar û gelek welatî tevlî vekirina kargehê bûn. Beriya vekirina kargehê koma zarokan a govendê ya Şaredariya Peyasê û beşdaran govend gerandin.
Ewilî Şanoger Sakîne Jîr xêr hatina beşdervanan kir û got: “Huner ligerîna heqîqatê ye. Armanca me ew e ku em bi hunera xwe dengê xwe bigihînîn zarokên vî welatî. Ev dengê ku dibe pênûsa Apê Mûsa, dengê Elî Temel ji bo me serbilindî û nexşerê ye. Miletekî bê huner û çand mehkumê mirinê ye.”
‘Dagirker ewilî êrişî ziman, çand û hunerê dikin’
Hevşaredar Cengîz Dundar destnîşan kir ku li ser vê axê gelê Kurd dîrokek nivîsandiye û ji vê saetê pê ve jî divê ev dîrok were mezinkirin û wiha got: “Weke ku hûn jî dizanin, dema desthilatdar diçin welatekî dagir bikin, cihên yekem ku êriş dikinê çand, huner, ziman û modela jiyanê ya wî welatî ye. Qeyûman jî li Kurdistanê ji roja ku dest pê kirin û vir ve qadên yekem ku êriş kirinê dîsa ev qad bûn. Me jî bi van saziyên ku di nava van 3 mehan de vekirin, bersivek da wan. Em ê ji doza xwe venegerin.”
‘Em ê hertim girîngiyê bidin xebatên bi vî rengî’
Hevşaredar Berîvan Gulşen Sîncar diyar kir ku hemû kes dizane ku çand ji bo gelê Kurd çiqasî girîng e û tê çi wateyê û got: wateyê. “Em di pêvajoyeke pir girîng re derbas dibin û li ser milê her yek ji me berpirsiyariyeke mezin heye. Em dixwazin çanda berxwedanê ya vî bajêrî bi hunerê re bînin cem hev. Bi salan e li ser vê erdnîgariyê polîtîkayên giran hatin meşandin da ku Kurd bîra xwe winda bikin. Lê belê her çiqasî polîtîkayê qirkirinê hebûya jî vê erdnîgariyê şahidiya têkoşîneke mezin jî kir. Tevî van hemû zehmetiyan jî, eger huner û çanda me hîn jî zindî ye, ev bi saya Halîl Dag, Hozan Serhad û Delîla ye û em minetdarên wan in. Îro li vir bûn û amadebûna me, bersivek e li dijî wan kesên ku ciwanên me ber bi hişbîr, fihûş û rêyên xirab ve dikişînin. Em ê her dem girîngiyê bidin xebatên bi vê rengî û em ê hîn bêtir bixebitin.”
Piştî axaftinan, kargeh bi awayekî çoş ji aliy Berîvan Gulşen Sîncar, Cengîz Dundar û beşdaran ve kordele hat jêkirin.
Piştî jêkirina kordeleyê Koma govendê ya zarokan a Kargeha Yektayê derketin li ser dikê govend gerandin. Piştî govenda zarokan, şagirtên kargehê stran gotin û herî dawî jî hunermend Sabir Erkan derket li ser dikê stran gotin. Vekirina kargehê bi çoşeke mezin dawî bû.
