DBPê daxuyanî da û diyar kir ku ji bo alîkarî û piştgiriya gelê Rojava dest bi kampanyayê dikin.
Li hemberî krîza mirovî ya li herêmê ku piştî êrîşên Tirkiyeyê û çeteyên xwe dispêre Tirkiyeyê yên li ser Bakur û Rojhilatê Sûriyeyê destpê kir, karên Rêveberiya Xweser dewam dikin. Partiya Herêman a Demokratîk (DBP) daxuyanî da. DBPê anî ziman ku ji bo mirovên ji cih û warê xwe bûne wan dest bi kampanya alîkariyê kirine. Rêxistina Amedê ya DBPê li avahiya xwe civîneke çapemeniyê li dar xist û destpêkririna kampanyayê ragihandin.
Hevserokê DBPê yê Amedê Mehmet Şîrîn Gurbuz axivî û anî ziman ku êrîş li ser mafê jiyanê yê gelê Kurd tê kirin. Mehmet Şîrîn Gurbuz da zanîn ku Artêşa Neteweyî ya Sûriye (ANS) yên ku Tirkiye piştgiriya wan dike û êrîşî Bakur û Rojhilatê Sûriyeyê dike, DAIŞî ne ku tenê nav û kincê xwe guhertine. Gurbuz wiha axivî: “Dest ji polîtîkayên xwe berdin ku mafê jiyanê nade gelê Kurd, şer û tecrîdê ferz dike. Dîmenên dikevin medyayê cihê metirsiyê ne. Em bi mejiyekî welê re rû bi rû ne ku dijminê jinê, xakê û mirovahiyê ye.”
Mehmet Şîrîn Gurbuz êrîşên li ser Rojava û herêmên Kurdan weke êrîşa li ser Amedê pênase kir û got, “Weke gelê Amedê û gelê Kurdistanê em dixwazin bibêjin ku li hemberî êrîşên bi vî rengî em ê bêdeng nemînin. Ji bo şert û mercên jiyaneke aştiyane bêne afirandin, danûstandin bêne kirin divê tecrîda li Îmraliyê bê rakirin, bi Birêz Abdullah Ocalan re hevdîtin bê kirin û pêşniyarên wî bêne wergirtin.”
Mehmet Şîrîn Gurbuz bal kişand ser ruhê Kobanê û wiha axivî: “Em kampanyayên alîkarî û piştgiriyê yên têne destpêkirin xurt bikin. Çawa ku bi ruhê Kobanê gelan çi ji dest hat kirin û gelê Kurd bi tenê nehiştin, gelê Rojava îro jî li benda alîkariya gelê Kurdistanê, gelên Tirkiyeyê û tevahiya mirovahiyê ye. Destê bê dirêjkirin destê biratiyê ye, destê ji bo mirovahiyê ye.”
‘Dilê me bi gelê Rojava re ye’
Hevseroka DBP’ê ya Amedê Sûltan Yaray jî anî ziman ku ji ber êrîşan mirov neçar man koç bikin û bangeke bi vî rengî kir: “Em destê xwe dînin ser wijdanê xwe û piştgiriyê bidin kampanya alîkariyê. Li gorî hêza xwe betanî, kinc, xwarin, pêlav, erzaqê kom bikin û bigihînin avahiyên me yên navçeyan ku em karibin destê xwe bigihînin Rojava. Bila gelên Rojava û Sûriyeyê zanibin ku dilê me bi wan re ye. Ji bo wan çi ji destê me bê em ê bikin.”
