Kovara Jineolojiyê li Amedê bi beşdariya sedan jin 10 saliya xwe pîroz kir. Di şahiyê de qala girîngî û wateya Jineolojiyê hat kirin.
Kovara Jineolojiyê li Amedê bi şahiyekê 10 saliya xwe pîroz kir. Şahiya pîrozbahiya salvegera 10emîn a Jineolojiyê li Navenda Kongreyê ya Çand Amedê hat lidarxistin. Xebatkarên Jineolojiyê û bi sedan jin tev li şahiyê bûn. Li ber deriyê eywana şahiyê 33 wêneyên ku wek bergên kovarê hatine bikaranîn hatin danîn. Pankarta “Jin jiyan azadî” hat daliqandin û standa kovaran hat danîn. Li hundirê ewyanê jî wêneyê rojnamevan û akademîsyen Nagihan Akarsel a li Silêmaniyê hatibû qetilkirin, hat daliqandin.
Dayikên Aştiyê û bi sedan jin di şahiyê de amade bûn. Beriya şahî dest pê bike, jinan li ber muzîkê govend gerandin. Piştre bernameyê dest pê kir. Ewilî sînevziyona ku qala Jineolojiyê dikir hat temaşekirin. Paşê jî bi beşdariya axêver Fîgen Aras û Rojda Yildiz ku xebatkarên kovarê ne gotubêjek hat lidarxistin. Fîgen Aras û Rojda Yildiz di gotubêjê de qala girîngî û naveroka jineolojiyê kirin.
Li ser navê xebatkarên kovarê Medya Kaya derket ser dikê û daxuyaniya ku qala Kovara Jineolojiyê dikir xwend.
Dû re Koma Govendê ya KASEDê derket ser dikê û li ber def û zirnê cureyên govendê gerand.
Koma JinMa jî derket ser dikê û stranan gotin. Şahî bi berzkirina dirûşma “Jin jiyan azadî” û gerandina govendê bi dawî bû.
Xebatkar û xwînerên Kovara Jineolojiyê ji ajansa me re axivîn û bal kişandin ser naveroka Jineolojiyê ku wek zanistek jinan tê zanîn û destnîşan kirin ku Jineolojî xwebûn û xwenasîn e.
