MATUHAYDERê di çarçoveya çalakiyên 8ê Adarê de li Stenbolê daxuyanî da û ji jinên girtî re fularên 8ê Adarê şandin. Di daxuyaniyê de hat diyarkirin ku jinên Kurd bi salan e, li dijî hişmendiya baviksalarî û tunehesibandinê li ber xwe didin û wiha hat gotin: “Ruhê 8ê Adarê di nava diwaran de nayê sekinandin.”
Komeleya Alîkarî û Piştevaniyê ya bi Malbatên Girtî û Hikumxwaran re ya Marmarayê (MATUHAYDER) di çarçoveya bernameya 8ê Adarê de li PTTa Bakirkoyê ji jinên girtî re fularên 8ê Adarê şand. Di çalakiyê de pankarta “Ji bo azadiya jinên girtî, em jiyanê dihonin” hat vekirin û dirûşmên “Jin, Jiyan, Azadî” û “Bijî berxwedana zindanan” hatşz berzkirin. Berî ku fular werin şandin li pêşiya avahiyê PTTê daxuyanî hat dayîn. Daxuyaniyê Rêvebera MATUHAY-DERê Sevgî Çoban xwend.
‘Berxwedana jinan ne tenê herêmiye, netewiye’
Sevgî Çoban diyar kir ku ji li her derê Tirkiyeyê bi tundî û bêparastinê re rû bi rû ne û wiha axivî: “Keda jinê erzan tê dîtin. Tundiya ku li ser jinan pêk tê, bi awayekî sîstematîk e. Li vî erdnigariyê têkoşîna jinên Kurd, berxwedana 8ê Adarê şênber dike. Jinên Kurd bi salan e, li dijî hişmendiya baviksalarî û tunehesibandinê li ber xwe didin. Tenê daxwaza jiyaneke hevpar nekirin, herwiha nîşan dan ku jiyanekê azad pêkan e jî. Jin li Rojavayê, nîşanî cîhanê dan ku jin avakarên jiyanê ne. Berxwedana jinan ne tenê herêmî ye, navneteweyî ye jî.”
‘Ruhê 8ê Adarê di nava diwaran de nayê sekinandin’
Di dawiyê daxuyaniyê de Sevgî Çoban anî ziman ku îro jinên ku di girtîgehan de tên ragirtin remza berxwedanê ne û got: “Berxwedana wan ne tenê kesane ye, berdewamiya lêgerîna azadiya kolektîf e. Li girtîgehan jin bi salan e li dijî sirgûn, cezayên keyfî û tevahî astengiyan li berxwe didin. Dixwazin vîna jinan bişkînin. Lê em dizanin ku rûhê 8ê Adarê di nava diwaran de nayê sekinandin. Li dijî zextam berxwedan berdewam dike. Ber bi 8ê Adarê ve em jinên ku ji derve û di girtîgehan de li ber xwe didin, silav dikin.”
‘Em dixwazin Serok Apo azad be’
Dû re Dayika Aştiyê Sultan Bozkurt axivî û got: “Bi salan e jinên Kurd ji bo azadiya gelê Kurd di girtîgehan de tên ragirtin. Rêberê Gelê Kurd ji bo jinan di 27ê Sibata 2025 û 2026an de peyam şand. Em dixwazin Serok Apo azad bibe. Îro di girtîgehan de poşmantî li zarokên me re ferz dikin lê zarokên me li ber xwe didin.”
Jin piştî daxuyaniyê ji jinên girtî re fularên 8ê Adarê şandin.
