Şirnex – Goristana PKKyiyan a li kuntara Çiyayê Herekolê ji aliye leşkerên Artêşa Tirk ve hatiye rûxandin û şopa gorên 63 endamên PKKê xuya nake.
Goristana Herekolê ango bi navkirina PKKê Şehîdgeha Şehîd Ezîma û Şehîd Resûl Goyî ji aliyê PKKê ve di sala 2014yan de li Herêma Çemê Karê yê navçeya Berwariya Sêrtê hatibû avakirin û gorên 63 endamên PKKê yên di dîrokên cuda de jiyana xwe ji dest dabûn lê hebûn. Lê di meha sermaweza 2017yan de ji aliyê leşkerên Artêşa Tirk ve hat rûxandin. Li gor agahiyên çavkaniyên herêmê dane, dema 2017yan koçerên li herêmê çûyîne deştê, leşkerên Artêşa Tirk li gel makîneyên kar ketine Herêma Çemê Karê û dest bi rûxandina goristana li Herêma Bersor kirine.
Şopa goran jî xuya nake
Kesî beriya rûxandina goristanê ev der nedîtibe nizane ku li vir berê goristanek hebûye. Ji ber ku tu şopên gorên 63 PKKyiyan niha xuya nakin û goristan weke zeviyekî dixuyê. Her wiha tu şopên mecsîd û mêvangeha hatibûn çêkirin jî xuya nakin.
Gorên PKKyiyan li ku ne?
Li gel vê rûxandinê pirsa gorên PKKyiyan li ku ne derdikeve holê. Li gor çavkaniyên herêmê yan gorên hemû PKKyiyan li heman derê hatine binaxkirin an jî bi kepçeyan li kamyonan bar kirine û birine deverek din.
