Rêxistinên mafên mirovan ên li Amedê bi boneya Hefteya Mafên Mirovan meş li dar xistin. Saziyan xwestin mafên mirovan bê parastin û ji bo aştiyê tecrîda li ser Rêberê PKKê Abdullah Ocalan bê rakirin.
Rêxistinên mafên mirovan bi wesîleya 10-17ê Kanûnê Hefteya Mafên Mirovan a Cîhanê meşa “Mafên Mirovan” li dar xistin û daxuyanî dan çapemeniyê. Çalakî bi pêşengiya Komeleya Mafên Mirovan (ÎHD), Baroya Amedê, Komeleya Hiqûqnasên Ji bo Azadiyê (OHD), Weqfa Mafên Mirovan a Tirkiyeyê (TÎHV), Komeleya Jinan a Rosayê û Odeya Bijîşkan a Amedê bi wesîleya rojê li Qada Şêx Seîd (Deriyê Çiyê) kom bûn û dest bi meşê kirin.
Nûner û rêveberên rêxistinên sivîl û gelek kes beşdarî meşê bûn. Di meşê de pankarta “Daxûyanameya Gerdûnî 76 salî ye, Aştî bi mafên mirovan pêkan e” hat vekirin û dowîzên bi zaravayê Kurmancî û Kirmanckî û bi zimanê tirkî hatin hildan. Di meşê de dirûşm hatin berzkirin. Meş li ber Girtîgeha Kevn a Amedê ya li Deriyê Serayê bi dawî bû.
‘Divê tecrîda li ser Ocalan bê rakirin’
Sekreterê ÎHDa Amedê Omer Saman li ser navê saziyan daxuyanî xwend. Saman di daxuyaniyê de bal kişand ser binpêkirinên mafan mirovan û diyar kir ku li her qadê mafên mirovan tên binpêkirin. Saman bal kişand ser tecrîdkirina giran a li ser Rêberê PKKê Abdullah Ocalan û got: “Pêwîste tecrîda li ser Abdullah Ocalan û hemû astengiyên li pêşiya mafên wî bên rakirin. Ji ber vê yekê divê demildest muzakereyên ji bo çareseriya demokratîk û aştiyane ya pirsgirêka kurd bên destpêkirin. Em bang dikin ku hemû astengiyên li pêşiya hevdîtinên parêzer û malbatên girtiyên li Girava Îmraliyê Veysî Aktaş, Omer Hayrî Konar û Hamîlî Yildirim bên rakirin.”
