Gelê Bakur û Rojhilatê Sûriyeyê ji 7 salî heta 70ê salî ku ji hemû pêkhateyan pêk tên, li ser Bendava Tişrînê nobedê digirin û bendavê ji êrîşan diparêzin.
Bi sedan kesên ku ji pêkhateyên Kurd, Ereb, Asûr, Suryan ên ji Bakur û Rojhilatê Sûriyeyê ji bo parastina Bendava Tişrînê ji 8ê çile heta niha 67 rojin di çarçoveya Şerê Gel ê Şoreşgerî de li ber xwe didin. Gel bi coş û moraleke mezin berxwedana li bendavê dimeşînin û dawiyê dewrî komên nû dikin. Bi sedan ji gelê kantona Firatê îro di danê sibehê de ber bi Bendava Tişrînê ve bi rê ketin, gelê li wir ji danê sibehê û heta derengiya şevê bê navber dirûşmên “Berxwedan jiyan e” û “Em ji mirinê mezintirin” berz kirin.
Gelê li Bendava Tişrînê li ber xwe didin ji ANFê re axivîn.
Endamê Meclisa Edaletê Ibrahîm Metînê anî ziman ku heta ku êrîş radiwestin ew ê li vir bin. Metînê diyar kir ku ew ji bo kehrebe û avên xwe li vir in û wiha axivî:”Zzêdetirî 2 meh in li ser vê bendavê berxwedaniyeke nayê pênasekirin heye. Ji hemû netewên Bakur û Rojhilatê Sûriyeyê berxwedaniyeke bê hempa tê kirin. Me ew soz daye ku em ê heta dawiyê xwedî li zarokên xwe derkevin û em ê piştgiriya zarokên xwe yên di nava çeperên şer de ne bikin. Em jî weke gelê Kantona Firatê ev konvoya me ya 6`emîne. Ez jî weke kes ev cara min a 4’emîne ku ez tême vir. Em ji bo bendava xwe, ji bo av û kehrebe û zarokên xwe li vir in.”
Dayika bi navê Xanim Omer Daban jî anî ziman ku ev bendava wan e û ew ê heta dawiyê li bendava xwe bin û got, “Em li pişta zarokên xwe ne. Ev bendava me ye, em ê bendava xwe biparêzin û tu tiştên Erdogan û çeteyên xwe li gel me tune.”
Dayika bi navê Wedhê Birahîm Temo jî ruxmî ku temenê xwe gelekî mezine jî berê xwe daye bendava Tişrînê û ev tişt anî ziman: “Em hatin bendava xwe biparêzin, em hatine av û kehrebeya xwe ji dest dijminê xwe biparêzin. Ji 7 salî heta 70 salî em li vir in, divê êdî em rabin ser piyan û serkeftinê misoger bikin.”
