Balafirên Îsraîlê êrişî Nexweşxaneya Nasir kir. Di êrîşê de 4 jê rojnameger 14 kes hatin kuştin.
Balafirên şer ên Îsraîlê êrîşî nexweşxaneyekê kir. Di êrîşê de 14 kes hatin kuştin. Berpirsên beşa Tenduristiyê ya Filistînê diyar kir ku balafirên Îsraîlê Nexweşxaneya Nasir a li Xezayê bombebaran kir. Di encamê de gelek kes di nav de rojnamevan hatin kuştin. Kanala “El Eqsa” der barê mijarê de daxuyand ku di bombebarana Îsraîlê ya li dijî Nexweşxaneya Nasir de, 4 jê rojnameger 14 kes hatin kuştin. Rojnamegerên hatin kuştin wina ne: Mihemed Selame, Meryem Ebû Deqe, Husam El Misrî û Muaz Ebû Taha.
Piştî endamên agirkujî û ambulanc berê xwe da cihê bûyerê ku birîndaran rizgar bikin û kuştiyan derxin, Îsraîlê careke din êriş kir. Parastina Sivîl a Filistînê ragihand ku ajokarê agirkujiyê hat kuştin û 7 endamên ji tîma Parastina Sivîl a Xan Yûnisê birîndar bûn.
Dezgehên ragihandinê yên Filistînê ragihand ku di êrişên vê sibehê yên Îsraîlê li dijî deverên cuda yên Şerîda Xezayê de 20 kes hatin kuştin.
Çavkaniyek bijîşkî ya Nexweşxaneya Şîfa ji ajansa WAFAyê ya Filistînê re bi bîr xist ku di êrişa balafirên Îsraîlê li dijî malekê li herêma Kerame ya bakurê rojavayê Xezayê de herî kêm 2 kes hatin kuştin û hejmarek birîndar bûn.
Wezareta Tenduristiyê ya Xezayê ragihandibû ku di 24 saetên dawîn de ji ber xela û xwarina nebaş 11 kes mirin. Bi wê re hejmara miriyan a ji ber xelayê li Şerîda Xezayê derket 300 kesî, di nav de 117 zarok in.
