Di danişîna doza Ahmet Gun ê HDPî yê ji aliyê cerdevan Siddik Babat ve hatibû kuştin pêk hat. Derket holê ku çeka ku Ahmet Gun pê hatiye kuştin aidî cerdevanan e.
Rêveberê Partiya Demokratik a Gelan (HDP) Ahmet Gun di 11ê kanûna 2023yan de li çolterê bajarokê Sêgirkê yê navçeya Qileban a Şirnexê ji hêla cerdevanan ve hatibû kuştin. Kurê wî Abdurrahîm Gun jî birîndar bûbû. Têkildarî bûyerê ji ber sûcên “kuştina bi zanebûn” û “hewldana kuştina bi zanebûn” li cerdevanê teqawid Enver Babat (60), cerdevan Siddik Babat û kurê wî Ebubekir Babat û kesê bi navê Omer Yakar doz hatibû vekirin. Danişîna 4emîn a dozê li 2yemîn Dadgeha Cezayên Giran a Şirnexê pêk hat. Endam û rêveberên Partiya Herêmên Demokratik (DBP), Partiya Wekhevî û Demokrasiyê ya Gelan (DEM Partî) ên Şirnex û navçeyên wê, parlamentera DEM Partiyê jî tevlî danişînê bûn.
Danişîn bi tespîtirina nasnameyê dest pê kir. Piştî tespîtkirina nasnameyê endamên Komîsyona Hiqûqê ya DEM Partî, parêzêr Pîrozhan Karalî Guler, Salîh Tekîn û parêzera malbatê Ozum Vurgun parastin kirin. Di destpêkê de parêzer Pîrozhan Karalî Guler axivî û daxwazên xwe anîn ziman. Daxwazên parêzeran wiha ne: “Bila qeydên HTSê bên tomarkirin û tevlî dosyayê be kirin. Çekên ku di bûyerê de hatine bikaranîn bila bê lêkolînkirin û bê tespîtkirin ku ew cêk aidî TSKê ne an na. Cihê bûyerê bê lêkolînkirin û her sê bersûcên ku bi negirtî tên darizandin jî bên girtin.”
Piştre parêzer Salîh Tekîn parastin kir û bi lêv kir ku lêpirsîneke bi bandor nehatiye destpêkirin û ev tişt anîn ziman: “Gumana me heye ku kujer ji ber ku cerdevanin tên parastin û delîl tên şîlo kirin. Ji ber wê jî daxwaza me ya qeydên HTS divê bi cih were. Her wiha ji bo tedbîr divê bersuc bên girtin û darizandin.”
Piştrê parêzerê bersucan axivî û daxwaza berdana Siddik Babat kir. Piştrê Siddik Babat ê li Girtîgeha Hejmar 3an a Amedê bi SEGBÎSê tevlî danişînê bû û daxwaza berdana xwe kir.
Ahmet Gun bi çeka cerdevaniyê hatiyê kuştin
Piştî parastinan heyeta dadgehê navberda û piştî navberê biryara xwe aşkera kir. Heyeta dadgehê daxwazên parêzeran a lêkolînkirina qeydên HTS, lêkolîn kirina cihê bûyerê û girtina her 3 bersûcan ret kir. Heyeta mahkeme daxwaza lêkolînkirina çekan jî ji ber nivîs ji TSK hatiye ret kir. Di nivîsa ji TSK hatiye de derket holê ku ew çeka ku Ahmet Gun pê hatiye kuştin aidî cerdevaniyeyê.
Heyeta mahkeme der barê Siddik Babat ê girtî de jî biryara berdewamiya girtinê da û ji bo bersûcan jî biryara berdewamiya şertê kontrola edlî da.
Heyeta mahkeme danişîn jî taloqî 10 Adarê kir.
