Rejîma Îranê kesên ku li gorî wê nafikire û li gorî wê tev nagere an ceza dike an jî darve dike. Rejîmê di 3 mehên dawî de 230 kes darve kir û di mehek dawî de 5 welatî ceza kirin.
Rejîma Îranê çalakvana siyasî Gelare Ebasî li Tehranê bi du tometên cuda cezayê girtîgehê li wê birîn. Rêxistina mafê Mirovan a Herana ragihand ku rejîma Îranê cezayê girtîgehê li çalakvana siyasî Gelare Ebasî birî. Li gorî agahiyên Herana belavkirî, Gelare Ebasî ya 49 salî û xelkê Tehranê, ji aliyê liqa 23 ya Dadgeha Şoreşê ya Tehranê ve bi 4 sal û 3 meh cezayê girtîgehê hate mehkûmkirin.
Hêjayî gotinêye ku di 17ê Sibata îsal de çalakvana siyasî Gelare Ebasî li mala xwe ya li Tehranê, ji aliyê hêzên Wezareta Îtlaatê ya Îranê ve, bêyî fermana dadwer hate binçavkirin û ji bo girtîgeha Evînê hate şandin. Piştî di 28ê Adarê de bi şêweyek demkî û bi dayîna milyarek tîmen heta dema darizandinê hatibû berdan.
Rejîmê melayê kurd ceza kir
Zext û gefên rejîma Îranê yên li ser melayên Kurd zêde bûye. Di meha Nîsanê de melayek Kurd li Kirmanşan hate binçavkirin û melayek din jî li Seqîz bi cezayê girtîgehê hate mehkûmkirin. Tora Mafên Mirovan a Kurdistanê ragihand ku rejîma Îranê melayek Kurd binçav kir û melayek din jî cezayê girtîgehê bi ser de sepand.
Rejîmê 2 hunermend ceza kir
Îranê cezayê girtîgehê li derhênerên fîlmê ‘Pastaya ku herî zêde jê hez dikim’ (My Favourite Cake) Maryam Moghadam û Behtash Sanaeeha birî.
