Mihefizên Şoreşê yên Îranê ragihand ku li navenda fermandariyê ya operasyonên taybet a DYAyê ya li herêma El-Tanf a li Sûriyeyê xistin e. Êrişên DYAyê yên li ser Îranê jî di şeva şeşemîn de dewam kirin.
Mihefizên Şoreşê yên Îranê bi daxuyaniyekê ragihand ku li navenda fermandariyê ya operasyonên taybet a Dewletên Yekbûyî yên Amerîkayê (DYE) ya li herêma El-Tanf a li Sûriyeyê xistin e. Medya dewletê ya Îranê diyar kir ku êriş weke bersiva li êrişa li Îranşahrê hatiye kirin ku di encamê e leşkerên Îranî jiyana xwe ji dest dabûn.
DYAyê meha Sibatê ragihandibû ku xwe ji baregeha El-Tanfê vekişandiye û kontrola baregehê radestî artêşa Sûriyeyê kiriye.
DYAyê di şeva şeşemîn de jî êriş kir
Li aliyê din, artêşa DYAyê ragihand ku di şeva şeşemîn de êrişên xwe yên hewayî yên li ser Îranê dewam kiriye. Fermandariya Hêzên Navendî ya DYAyê (CENTCOM) ragihand ku sîstemên çavdêriya peravî, tesîsên parastina hewayî, binesaziya lojîstîkî ya leşkerî û tesîsên deryayî jî di nav de li dehan hedefên leşkerî xistin e.
Îranê gef xwar
Îranê jî îdia kir ku êriş li hemberî sivîlan hatiye kirin. Berdevkê artêşa Îranê got: “Eger DYA êrişê bibe ser binesaziya Komara Îslamê hemû navendên xwe yên li herêmê wê ji bo Îranê bibin hedefên rewa.” Bi vî rengî derbarê hedefên li welatên Kendavê de hişyarî da.
Kûweyt, Qata û Bahreyn di alarmê de ne
Hêzên çekdar ên Kûweyt û Qatarê ragihandin ku vê sibehê bûn hedefa êrişên hewayî. Li Bahreynê sîrenên êrişa hewayî 2 caran kete dewrê.
Rayedarekî leşkerî ji televîzyona dewletê ya Îranê re axivî û anî ziman ku bi balafirên bêmirov ên bombebarkirî li nuqteyên leşkerî yên DYAyê yên li Kûweytê xistin.
Pakistanê banga muzakereyê kir
Pakistan ku li herêmê hewldanên navbeynkariyê dike, bang li aliyan kir ku şer rawestînin û jinûve dest bi muzakereyê bikin. Lê belê sermuzakerevanê Îranê Muhammed Bakir Galibaf got: “Peymanek dema ku xalên wê derbasdar bin û bi cih bên anîn, hingî bi wate ye.”
Qesra Spî: Em hê jî ji dîplomasiyê re vekirî ne
Berdevka Qesra Spî Karoline Keavitt jî diyar kir ku Donald Trump hîn jî ji dîplomasiyê re vekiriye.
Piştî ku Îranê hefteya derbasbûyî Tengava Hurmizê li trafîkê girt, çûn û hatina keştiyan gelekî kêm bû. Li gel vê yekê li bazara navneteweyî bihayê warîleke petrola Brentê îro di asta 85 dolarî de ye.
