Şaxa ÎHDê ya Îzmîrê bal kişand ser rewşa girtiyê nexweş ê 70 salî Kazim Avci û diyar kir ku ew ne di rewşeke wisa de ye ku li girtîgehê bimîne û bang kir ku biryara înfaza wî bê taloqkirin û demildest bê berdan.
Şaxa Komeleya Mafên Mirovan (ÎHD) a Îzmîrê, daxuyaniya xwe ya çapemeniyê ya ku du hefteyan carekê ji bo girtiyên nexweş li dar dixe, li ber Şaxa Sumerbankê ya Kevn a Konakê domand. Di daxuyaniyê de bal hat kişandin ser rewşa tenduristiyê û binpêkirinên mafan ên li ser girtiyê nexweş Kazim Avci yê ku li Girtîgeha Tîpa F a Hejmara 1 a Sincanê tê ragirtin. Di çalakiyê de pankarta ‘Girtiyên nexweş dimirin, bêdeng nemîne nebê şirîkê sûc’ hate vekirin. Daxuyanî li ser navê girseyê ji aliyê Rêvebira Şaxa ÎHDya Îzmîrê Nazli Tûran ve hate xwendin.
‘Tevî astengdariya ji sedî 78 jî tê girtin’
Nazli Turan diyar kir ku Kazim Avci nêzî 10 sal in bêyî ku biryareke dadgehê ya qedandî li ser hebe, tê girtin û wiha got: “Kazim Avci yê ku xwediyê rapora astengdariyê ya ji sedî 78 e, ji ber ku lingê wî yê çepê nîn e, bi alîkariya protezeke 5 kîloylî û bi kopal û kulavan dimeşe. Ji ber protez û astengdariya xwe ya fîzîkî di sewqên nexweşxaneyê de di dema siwarbûna wesayîtên ringê û meşê de zehmetiyan dikişîne. Kazim Avci yê ku nexweşê dil ê bi ‘kêmbûna mîtral’ e, di 2yê Sibata 2022yan de li girtîgehê krîza dil derbas kir û li Nexweşxaneya Bajar a Enqereyê anjiyo bû û stent hate danîn ser damarê wî yê girtî. Xebata dilê wî ketiye asta ji sedî 40î, ger bikeve bin ji sedî 40î divê pîlê dil bê danîn. Her sal bi taybetî di demên hewaya sar de nexweşiyên iltîhaba perîkardîtê lê peydq dibin. Li benda tetqîqatan e ku gumana penceşêra mîzdankê heye û bi xetera pençeşera prostatê tê şopandin. Rojê sibehê û êvarê bi giştî 12 heb dermanên dil, 2 heb prostat, 2 heb şekir û yek heb jî dermanê kêmbûna mîtral û gelek dermanên giran bi kar tîne.
‘Bila berpirsyar erkên xwe bînin cih’
Nazli Turan diyar kir ku girtiyê nexweş Kazim Avci her kêliyê bi tirsa derbaskirina krîza dil a nû û felçbûnê re dijî û di bin zexta nexweşiyên giran de di nava xerab bûneke kûr a psîkolojîk re derbas dibe û ev tişt anî ziman: “Tevî astengdariya xwe ya giran û nexweşiyên xwe yên kronîk ên pirjimar ku xetereyeke mezin li ser jiyanê çêdikin, domandina girtîbûna nexweş ê 78 salî; di çarçoveya mafê jiyanê yê ku di xala 17emîn a Destûra Bingehîn de hatiye mîsogerkirin û mafê parastina hebûna madî û manewî ya kesî de û di çarçoveya xalên 2 û 3 ên Peymana Mafên Mirovan a Ewropayê de binpêkirineke giran a mafan e û muameleyeke li dijî rûmeta mirovahiyê ye. Em di serî de Wezareta Dadê, hemû saziyên têkildar vedixwînin ku erkên xwe bînin cih û gavên lezgîn bavêjin.”
Daxuyaniya çapemeniyê piştî çalakiya rûniştinê bi dawî bû.
