Komîsyona Girtîgehan a Şaxa ÎHDa Stenbolê diyar kir ku girtî Tahsîn Sagaltici û Gurkan Turkoglu 266 roj in û Huseyîn Ozen ê 57 salî jî 247 roj in di çalakiya greva birçîbûnê de ne û xwest demildest daxwazên wan werin qebûlkirin.
Komîsyona Girtîgehan a Şaxa Komaleya Mafên Mirovan (ÎHD) a Stenbolê ji bo girtiyên bi navê Gurkan Turkoglu, Tahsîn Sagaltici û Huseyîn Ozen ên ku li dijî pêkanînên girtîgehê di greva birçîbûnê de ne li avahiya xwe daxuyanî da. Endam û rêveberên ÎHDê tev li daxuyaniyê bûn. Li eywanê pankarta “Em li girtîgehan mirinê naxwazin” hate vekirin. Daxuyanî ji aliyê Hevberdevka Komîsyona Girtîgehan a ÎHDa Stenbolê Meral Nergîs Şahîn ve hat xwendin.
‘Rewşa wan ber bi nebaşiyê ve diçe’
Meral Nergîs Şahîn diyar kir ku girtîgehên ku weke ‘bîrê’ tên pênasekirin tîpên YGC, Y û S ne û girtî di rewşeke zexmet de tên girtin û wiha axivî: “Girtîgehên weke bîrê jiyana girtiyan dixe nava xetereyê. Girtiyên ku di ‘Girtîgehên Bîrê’ de tên ragirtin her ku diçe tenduristiya wan xera dibe. Girtî bi qasî serê derziyê rojê nabînin. Girtîgehên tîpên YGC, Y û S, girtîgehên tecrîdê ne. Ev girtîgeh bi awayekî zane ji navendên bajaran dûr hatine avakirin. Girtiyên bi navê Tahsîn Sagaltici, Gurkan Turkoglu û Huseyîn Ozen ku di Girtîgeha Ewlehiya Bilind a Antalyayê de ne ji bo daxwazên wan bên qebûlkirin di grêva birçîbûnê de ne. Tahsîn Sagaltici ev 266 roj in di çalakiya greva birçîbûnê de ye. Tahsîn Sagaltici ketiye bin 40 kîloyî. Gurkan Turkoglu jî di 266 roj in di greva birçîbûnê de ye û rewşa wî ber bi nebaşiyê ve diçe. Huseyîn Ozen 57 salî ye û 247 roj in çalakiya xwe berdewam dike. Di hevdîtina xwe ya bi parêzer li ser kursiyê biteker anîne.”
‘Divê tecrîda li ser wan bê rakirin’
Meral Nergîs Şahîn destnîşan kir ku Tahsîn Sagaltici, Gurkan Turkoglu û Huseyîn Ozen di 10ê Nîsanê de sewqî nexweşxaneyê hatine kirin û got: “Ev 12 roj in li nexweşxaneyê tena serê xwe tên girtin. Ev sepan jî rewşan wan xerabtir dike. Êdî nikarin bi tena serê xwe pêdiviyên xwe bicih bînin. Serlêdanên ku refaket li cem wan be jî nayên qebûlkirin. Em li vir bang li Wezareta Dadê, Wezareta Tenduristiyê û Serdozgeriya Antalyayê dikin; divê parêzerên Tahsîn Sagaltici, Gurkan Turkoglu û Huseyîn Ozen demildest bi wan re hevdîtinê pêk bînin. Lazim e her sê girtî jî ji aliyê bijîşkên bêalî ve werin tedawîkirin. Divê demildest daxwazên wan werin bicihanîn. Tecrîda li ser wan bê rakirin.”
