Welatiyên Amedê çûyîna endamên Komîsyona Meclîsê ya cem Rêberê Gelê Kurd Abdullah Ocalan nirxandin û welatiyan diyar kir ku divê piştî vê hevdîtinê dewlet êdî gavên şênber biavêje.
Endamên Komîsyona Demokrasî, Xwişk-Biratî û Hevgirtina Mîlî ji bo hevdîtina bi Rêberê Gelê Kurd Abdullah Ocalan re roja 24ê Mijdarê berê xwe dan Girava Îmraliyê û hevdîtin pêk anîn. Endamên Komîsyonê Serokwekîla Koma DEM Partiyê Gulistan Kiliç Koçyîgît, Parlamenterê AKPê Huseyîn Yayman û Cîgirê Serokê Giştî yê MHPê Fetî Yildiz li Îmraliyê bi Abdullah Ocalan re rû bi rû hevdîtinê pêk anîn. Tê gotin ku hevdîtinê 3 saetan berdewam kiriye.
Har zanîn ku di hevdîtinê de li ser hûrgiliyên pêvajoya “Aştî û Civaka Demokratîk” axaftin û nîqaş hatine kirin. Heta niha derheqê naveroka hevdîtinê e daxuyaniyek fermî nehatiye dayîn. Li ser eşkerekirina girtekên hevdîtinê jî nîqaş berdewam dikin. Bê ka gelo Komîsyon di civîna xwe de li ser eşkerekirina girtekan çi biryarê dide.
Hemwelatiyên Amedê hevdîtina Komîsyonê ya li gel Abdullah Ocalan nirxandin û diyar kirin ku hevdîtinên veşartî nayên qebûlkirin û xwestin nêrîn û fikra Ocalan ji raya giştî re bê eşkerekirin. Her wiha welatiyan bal kişand ser azadiya fizîkî ya Abdullah Ocalan û gotin heya ku Abullah Ocalan azad nebe civak jî azad nabe.
‘Çûna Komîsyonê ya Îmraliyê tiştekî baş e’
Reşehat Ada derheqê çûyîna komîsyonê ya cem Ocalan de wiha got: “Komîsyon çû hevdîtinê, ev tiştekî pirr baş e. Aştiyeke bi rûmet dê çêbe. Bila her kes baş bizanibe heya Serokê me azad nebe, welatê me û girtiyên me yên siyasî jî azad nabin. Gelê me jî civak jî azad nabe. Lê ku gavên erênî ji aliyê dewletê ve neyê avêtin em qebûl nakin. Em ê heya azadiyê li ber xwe bidin.”
‘Bila gel bizanibe çi diqewime’
Bozan Baran jî gazinên xwe li dijî neeşkerekirina naveroka hevdîtinê anî ziman û got: “Çima veşartî diçin, bila bi eşkere biçin. Em nizanin çi hatiye axaftin, ku li gorî xwe biaxivin, em ê çawa baweriya xwe bi dewletê bînin. Bila êdî mafên Kurdan nas bikin. Em dixwazin bila her tişt bi gel re jî were parvekirin ku gel jî bizanibe çi diqewime.”
‘Azadiya wî azadiya me ye’
Almast Bagci jî bal kişand ser azadiya Rêberê Gelê Kurd Abdullah Ocalan û ev yek anî ziman: “Bila Serok Apo û hemû girtiyên me werin berdan. Bila êdî aştî çêbibe û Serokê me û girtiyên me bigihîjin azadiya xwe.”
‘Bi hevkariyê aştî çêdibe’
Welatiyê bi navê Vedat Soyal jî anî ziman ku bi hevkarî û yekîtiyê aştiyek mayinde dikare pêk were û got: “Çûyîna Komîsyonê ya Girava Îmraliyê, tiştekî pirr baş e û em ê bi ser bikevin. Pêvajo li ser banga Rêberê Gelê Kurd Abdullah Ocalan û bi hevkariya Devlet Bahçelî li pêş ket. Em çûyîna komîsyonê jî gelek erênî dibînin. Em dixwazin êdî di civakek azad de bijîn.”
‘Bila ew jî biratiya me qebûl bikin’
Muhammed Yilmaz jî got: “Heyet çûye Girava Îmralê, ev ev tiştekî pirr baş e. Abdullah Ocalan 27 sal in di girtîgehê de ye ev jî îradeyek pirr bi hêz e. Mirovek nikare ewqas sal tenê bimîne. Çawa ku em bi çavê biratiyê li gelê Tirk dinêrin, bila ew jî wisa me qebûl bikin.”
‘Azadiya Serok Apo dê pirsgirêkan çareser bike’
Welatiyê bi navê Omer Şahîn jî got: “ Bila êdî Serok Apo azad bibe, dema ku Serok Apo azad be êdî pirsgirêk jî li holê namînin. Xwîn bi xwînê nayê paqijkirin, ji bo wî jî êdî bila azadî were vî welatî.”
