Mamosteyên 12 roj in li Enqereyê di çalakiya greva birçîbûnê de ne Serdar Akturk û Beytullah Kayaalp diyar kirin ku ew ê dev ji çalakiya xwe bernadin û xwestin daxwazên wan werin bicihanîn.
Platforma Mamosteyên Mexdûrê Mulakatê û Mamosteyên Sektorên Taybet, ji bo pirsgirêkên xwe bînin ziman û daxwazwa mafên xwe bikin, di 14ê Hezîranê de li Enqereyê çalakiya gireva birçîbûnê dan destpêkirin. Mamosteyên Maxdurê Mulakatê, 12 roj in li ber avahiya Sendiqaya Mamosteyên Sektora Taybet a navçeya Çankaya ya Enqereyê de dest bi greva birçîbûnê û nobede kirine, gelek caran rastî astengî, êrişa polîsan hatin û hatin binçavkirin. Tevî vê yekê jî mamoste dev ji çalakiya xwe bernadin û bi biryardarî daxwazên xwe tînin ziman.
Ji mamosteyên maxdûrê mulakatê Beytullah Kayaalp û mamosteyê sektora taybet Serdar Akturk darbarê daxwaz û çalakiya xwe de axivîn.
‘Em ê têkoşina xwe berdewam bikin’
Beytullah Kayaalp ku ji Şirnexê hatiyê û maxdûrê mulakatê ye anî ziman ku ew e heta encamê bigirin dê têkoşîna xwe bidomînin û wiha axivî: “Di 14ê Heziranê vir de ji bo daxwazên me bi cih werin di çalakiyê de ne. Ew 12 roj in jî me dest bi greva birçibûne kiriye. Di sala 2013an de soza rakirina mulakatê dabûn me. Lê ew sozê xwe bi cih neanîn. Tevî ku mulakata min baş derbas bibû jî puaneke kêm dan min û ez di rêziknameyê de di paş de ketim. Ji bo daxwazên xwe bînin ziman me xwest em ber bi meclise ve bimeşin. Lê polîsan em dorpeç kirin û êrişî me kir. Ew çi jî bikin em li vir in û em naçin. Niha 28 hevalên me ji bo neheqiyên ji me hatine kirin û heqê me dest bixin dest bi greva birçîbûne kirine. Min jî dest bi grevê kiribû. Lê ji ber ku tenduristiya min rê neda neçar mam dev jê berdim. Rewşa hevalên me yên di grevê de ne jî ne baş e. Hevalên me rakirin nexweşxaneyê û her roj rewşa wan xirab dibe. Em ê têkoşîna xwe berdewam bikin. Me bi gelek sazî û kesayetan re hevdîtin kir. Lê me nekarî tu encameke bigirin.”
‘Divê mafê mamosteyan pêk werin’
Serdar Akturk ji Îzmirê tev li çalakyê bûye û mamosteyê sektora taybet e. Serdar Akturk anî ziman ku ew di nav zor û zahmetiyan de greva birçîbûne didomînin û wiha axivî: “Em 12 roj in di greva birçîbûne de ne. Em tenê şekir dixwin û bi avê çalakiya xwe didomînin. Tenduristiya hevalên me ji ber greva birçîbûnê xirab dibe lê tevî vê jî em di çalakiya xwe de bi israrin. Malbat û dayik jî tevlî çalakiya me dibin. Me heta ji sala 2015an muçeya asgarî distand lê bi daxwaza patronan ew mafê me jî ji me standin. Bi vê çalakiyê dixwazin balê bikşînin ser pirsgirêkên ku dikêşin û me xwest em daxwazên xwe bînin ziman. Lê li vir ji aliyê polîsan ve em rastî êrişeke hovanê hatin. Weke ku em ne mamostê ne lê dijminin êrişî me kirin û tundî li me kirin. Êrişî hevalên me yên di greva birçîbûnê de û dayikên hatibûn piştgiriyê kirin. Bi xaza îsotê ve êrişî me kirin û gelek hevalên ma bandor bûn. Em dixwazin komîsyon ava bibe û mafê mamosteyan werin pêkanîn. Niha em li ber xwe didin û em ê berxwedana xwe bidomînin.”
