Hevseroka Giştî ya DEM Partiyê Tulay Hatimogullari diyar kir ku daxuyaniya Hakan Fîdan li dijî ruhê pêvajoyê ye û got ku divê li gorî ruhê pêvajoyê û pêşketina aştiyê gav bên avêtin.
Hevseroka Giştî ya DEM Partiyê Tulay Hatimogullari piştî komcivîna partiya xwe li ber eywanê derheqê daxuyaniya Wezîrê Karên Derve Hakan Fîdan û hevdîtina Heyeta Îmraliyê û Serokkomar Erdogan de pirsên rojnamegerna bersivand.
‘Daxuyaniya Hakan Fîdan li dijî ruhê pêvajoyê ye’
Hatimogullari bal kişand ser daxuyaniya Hakan Fîdan û wiha got: “Di serî de Hakan Fîdan û hemû rayedarên hikûmetê di daxuyaniyên xwe de dibêjin ku li benda Sûriyeyê ye. Lê gavên ku li Sûriyeyê hatin avêtin û pêkanîna peymana 30yê Çile bi awayekî micid barê pêvajoyê sivik kir. Em dibêjin û difikirin ku li gorî vê sivikbûnê gav bên avêtin. Em vê hefteyê li bendê bûn ku Komîsyon xebatan bi leztir bike û gavên şênber biavêje, lê em vê daxuyaniya ku birêz Hakan Fîdan da gelek bêşens dibînin. Adeta mîna ku li ser nexşeyê lê dinêre ka arize û evrazên nû çawa werin afirandin, li meseleyê dinêre. Em vê daxuyaniya wî li gorî ruhê pêvajoyê nabînin. Em li bendê ne ku ji bo li asta herêmî aştî li pêş bikeve hin bêtir gavên erênî bên avêtin.”
‘Di bernameya heyetê de hevdîtin heye’
Hatimogullari bersiva pirsa derbarê hevdîtina Heyeta Îmraliyê û Serokkomar Tayyîp Erdogan de jî da û got: “Di bernameya heyeta me de hevdîtina li gel birêz Serokkkomar heye. Lê ev bername ango hevdîtin kengê pêk were ne diyar e. Heke zelal bibe dê heyeta me an jî dê berdevkên partiya me agahî bidin. Hin daxwazek fermî nehatiye kirin, lê belê daxwazek hevdîtinê heye û her kes veya dizane.”
