Li Mûsilê goreke komî ku gelek hestî têde hebûn vekirin. Tê gotin ku di gora komî ya li Goristana Hasfa ya li Mûsilê de hestiyên hatine dîtin ên Êzidiyan in.
Medya Iraqê, nûçeyek parve kir û da zanîn ku tîmên edlî yên taybet ên bajarê Mûsilê li Goristana Hasfayê dest bi kolandina gora komî kirine. Tê gotin ku gora komî dibe ku yek ji gorên komî yên herî mezin be. Rayedar dibêjin, hestiyên hatin dîtin dibe ku yên sivîlên Êzidî ku di 2014an de li Şengalê û derdora wê ji aliyê DAÎŞê ve hatin kuştin. Hestiyên ku hatin dîtin, ji bo tespîtkirina nasnameya wan, wê ji Saziya Tipa Edlî ya li Bexdayê re bêne şandin.
Gorên komî yên tên tespîtkirin, delîla şênber a komkujiyên DAIŞê ku di 2014an de li dijî civaka Êzidî pêk aniye ye. DAÎŞê di 3ê Tebaxa 2014an de êrîşî herêma Şengalê kiribû. Bi hezaran mêr ên Êzidî înfaz kir, jin û zarok kir kole û di nava şert û mercên li derveyî mirovahiyê dîl girt.
Di van êrîşan de ku ji aliyê Neteweyên Yekbûyî, Parlamenta Ewropayê û gelek rêxistinên mafên mirovan ve weke ‘qirkirinê’ têne qebûlkirin, herî kêm 5 hezar Êzidî hatin kuştin, nêzî 7 hezar jin û zarok hatin revandin.
