Mehmet Emîn Edemen ê ku 31 salan di zindanê de mabû, nexweş ketibû û sala 2023yan hatibû berdan, jiyana xwe ji dest da.
Mehmet Emîn Edemen (61) ê ku di sala 1992yan de li Sêrtê hatibû girtin û Tebaxa 2023an ji Girtîgeha Gîresûnê hatibû berdan şevê din li nexweşaneyek taybet a Êlihê jiyana xwe ji dest da. Mehmet Emîn Edemen beriya 20 rojan dema li Meletiyê li cem mala kurê xwe ye, xwîn diçe ser mêjiyê û wî tînin li Êlihê derman dikin. Edemen tevî hemû mudaxileyên tibî jî şevê din jiyana xwe ji dest da.
Malbata Edemen û rêveberên DEM Partiyê û DBPê yên Sêrt û Êlihê cenaze wergirtin û cenaze derengiya şevê birin li Goristana Sumerê ya li navçeya Misircê ya Sêrtê veşartin. Parlamentera DEM Partiyê ya Sêrtê, Hevşaredarên Misircê, rêveberên partiyan û gelek kes tev li merasîma veşartina cenaze bûn.
Ji bo Mehmet Emîn Edemen li Mala Şînê ya Seyîd Hecî Yûsûf Yavûz a li taxa Kulturê taziye hatiye danîn.
Mehmet Emîn Edemen di sala 1992yan de li navçeya Misircê ya Sêrtê tê girtin û 15 salan li Girtîgeha Sêrtê dimîne. Piştre demekî ji ber nexweşiyên xwe li Girtîgeha Amedê dimîne. Edemen herî dawî li Girtîgeha Gîresûnê dimîne û ji wir di Tebaxa 2023yan de tê tehliyekirin.
