Girtiyê nexweş Abdullah Aksû piştî 31 salan ji girtîgehê hate berdan.
Abdullah Aksû ku di Girtîgeha Hejmar 3 ya Tîpa T a Îzmîrê de dihat ragirtin, piştî 31 salan hate berdan. Aksû, ji aliyê malbata xwe û rêvebirên Komeleya Piştevaniya bi Malbatên Girtî û Hikûmxwaran re ya Egeyê (EGE-TUHAYDER) hate pêşwazîkirin.
Aksû li ber girtîgehê axivî û diyar kir ku ji ber berdana xwe keyfxweş e lê ji ber tehliyenebûna girtiyên nexweş xemgîn e û got: “Hêvîdar im ku hemû girtî bên tehliyekiirn. Rêbertiyê (Abdullah Ocalan) rêya aştiyê vekir. Ez bi hêvî me ku di demeke nêz de aştî pêk were û hevalên me bê berdan êm di welateke azad de hev bibînin.”
Aksû tevî malbata xwe ber bi mala xwe ya li Sêrtê ve bi rê ket.
Aksû di sala 1994an de li Sêrtê hate girtin û bi îdiaya “Xirakirina yekitî û yekparetiya dewletê” Dadgeha Ewlekariya Dewletê ya Amedê cezaya muebbedê dayê. Aksû, li girtîgehên Sêrt, Dîlok, Amed û Şakranê ma.
Nexweşiyên fitqa piştê, tansiyon, mîde, çav û hestî li Aksû peyda bûn e.
