Amed – Goristana Sîsê ya li navçeya Licê ji aliyê artêşa Tirk ve di sala 2015an de hat bombebarankirin û hilweşandin. Kêlikek li ser tirbeyan nemaye û hemû gor hatine rûxandin. Malbat dixwazin jinûve gorên zarokên xwe çêkin û goristan were avakirin.
Goristana Sîsê ango “Şehîdgeha Şehîd Amed û Şehîd Hevîdar” li gundê Sîsê ya ser bi navçeya Licê ya Amedê ve ye. Ev goristan di salên 2013-2014an de hate avakirin û çiqas endamên PKKê yên di salên 1990î de li herêmê jiyana xwe ji dest dabûn, li goristanê hatin veşartin. Di meha Tîrmeha 2015an de pêvajoya “çareseriyê” xera bû û artêşa Tirk ji nû ve êrişî çiyayên Kurdistanê û goristanan kir. Li navçe û bajarên Bakurê Kurdistanê çi goristanên endamên PKKê, endamên HPGê û şervanên YPG-YPJê hebûn hemû hatin rûxandin û xerakirin. Yek ji van goristanan jî Goristana Gundê Sîsê ye. Leşkerên artêşa Tirk di sala 2015an de êrişî Goristana Sîsê kir û hemû rûxand. Ev 10 sal in goristan xerabûyî ye û li goristanê kêlik li ser gorekî jî nemaye. Ji bilî serdanên cejnan malbat nikarin biçin serdana gorên zarokên xwe.
Li goristana Sîsê bi gelemperî 241 cenazeyên endamên PKKê hene. Goristan ji ber ku hatiye rûxandin û serdana ji bo vir qedexe ye gorên hatine rûxandin di nav pûş û giyayê hişk de mane. Ji ber ku çûna goristanê qedexe ye paqijî nayê kirin. Gelek gor ji ber ku kêlikên wan hatine şikandin, nayên nasîn û malbat nikarin gorên zarokên xwe bibînin.
Malbat dixwazin goristan jinûve were avakirin
Malbat ango xwediyên van goran dixwazin qedexeya li ser goristanê bê rakirin, gorên zarokên xwe jinûve çêkin û goristan dîsa mîna berê ava bikin. Malbat dibêjin li aliyekî heke aştî û çareserî tê axaftin li aliyekî jî êriş, qedexe û zextên li ser cenaze û gorstinan nayê qebûlkirin. Malbat dibêjin di vê pêvajoya aştiyê divê ewilî rêz û hurmet ji gor û cenazeyan re bê girtin. Malbat tînin ziman ku ew dixwazin goristan jinûve ava bibe û da ku birêkûpêk biçin serdana gorên zarokên xwe.
