Li Cizîrê tevî astengî û dorpêça polîsan jî siyasetmedaran û gel bi girseyî meş li dar xistin û serdana şîna endamê HPGê Ferhat Tunç kirin.
Li navçeya Cizîrê ya Şirnexê ji bo endamê HPGê Ferhat Tunç (Xebat Goyî) şîn hatiye danîn. Ji roja merasîma cenaze ve polîs şînê asteng dikin. Parlamenterên DEM Partiyê Salîha Aydenîz, Zeynep Odûncû Kûtevî, Sebahat Erdogan Saritaş, Newroz Ûysal Aslan, Kamûran Tanhan, Mehmet Zekî Îrmez û bi sedan welatiyên li ber avahiya DEM Partiyê ya Cizîrê kom bûn, bi berzkirina diruşmên, “Şehîd namirin”, “Bê Serok jiyan nabe” meş li dar xistin û serdana şînê kirin.
Her çiqas polîsan xwest pêşî li meşê bigire jî lê girseyê bertek nîşanî polîsan da û guh neda polîsan. Girseyê dorpêça polîsan hilweşand û meşa xwe pêk anî. Piştî ku girse gehişt mala şînê ya li taxa Nûrê ji bi cangoriyên azadiyê deqîqeyek rêz hate girtin.
‘Polîs li Cizîrê dîsa li pey provokasyonan e’
Piştî rêzgirtinê Parlanebter Saliha Aydenîz da zanîn ku polîs li Cizîrê dixwazin provakasyonê pêk bînin û wiha axivî: “Em ji bo taziyeya şehîdê xwe hatine vir. Lê em dibînin li Cizîrê dixwazin provokasyonê pêk bînin. Wezareta navxweyî û Walîtiya Şirnex dibêjin taziyeya xwe danin, lê ewlehiya Cizîrê ka emir ji ku derê distîne û dixwaze gelê me provake bike. Gelê Botanê her tim li ber xwe daye û îro jî ji bo nirxên xwe li ber xwe dide. Ji ber ku ev nirx bûne ronahiya vê civakê û îro bi saya wan pêvajoyek aştiyê hatiye destpêkirin.”
Piştî Aydenîz, dayîka Tunç, Rihan Tunç jî axivî û got ku ew sersaxiyê ji gelê Kurd û Rêberê Gelê Kurd re dixwaze.
Piştî axaftina dua hatin xwendin û serdana şînê bi dawî bû.
Endamê HPGê Ferhat Tunç (Xebat Goyî) di sala 2017an de li navçeya Berwarî ya Sêrtê jiyana xwe ji dest dabû û cenazeyê wî piştî 8 salan hate veşartin.
