Hewayê germ bi xwe re taybetî ji bo nexweş, zarok, ducanî, yên nexweşiyên xwe yên demdirêj hene metirsiyan tîne. Kesên ku pirsgirêkên xwe yên tenduristî hene taybetî di van rojên germahî zêde dibin de divê dest ji tevdîran bernedin, xwe ji tava dijwar biparêzin, xwe hênik bigirin.
Di mehên Hezîran, Tebax û Tîrmehê de bakurê cîhanê her ku diçe germtir dibe û germahiya zêde ji bo mirov û hemû zindiyan metirsiyan bi xwe re tîne. Metirsiyên germahiya zêde bi tevdîrên rojane dikarin werin kêmkirin û ji holê rakirin.
Tevgera nava rojê
Tîrêjên tavê serê sibê û berêvarkî hêj lewaztir dikevin li ser rûyê erdê û ji bo derketina derve, werzîş û karûbarên rojane saetên herî guncav in. Di navbera setên 11:00-16:00an tîrêjên rojê rasterast dikevin erdê û ev saet ji bo derketina derve, nayên pêşniyarkirin. Lewre bi qasî ji dest tê divê di bin siyê de were meşandin, meşên dirêj divê bi navberdayînan were domandin. Karên giran divê ji serê sibê yan jî êvarê re werin hiştin. Herwiha kesên erebeyên wan hene dema di bin tavê de erebeyên xwe dihêlin, dema siwarbûnê de divê nava wesayîtê hewadar bikin. Di germahiya zêde de divê zarok û ajalên kedîkirî di malan û wesayîtan de bêhewa neyên hiştin.
Cil û berg
Di hewayên germ de divê têra xwe û cilên germahiya tavê kêm dikin, rengên vekirî û bi pembû werin hilbijartin. Herwiha ji bo çav û rû biparêze kumên ku siya xwe didin li ser rû û patikê divê werin bikaranîn û berçavkên çavan ji tavê diparêzin werin bikaranîn. Herwiha pêlavên hewayê digirin û nahêlin bêhn ji piyan bên divê werin pêkirin.
Xwarin û vexwarin
Rojên germ divê xwarinên giran, birûn û germ bêhtir, xwarinên sivik werin hilbijartin. Selete, mast, zebzeyên demsalî û fêkiyên avî (zebeş, petêx, şeftalî) werin hilbijartin. Li şûna xwarina zêde ya carekê divê di nava rojê de parçe parçe û kêm xwarin were xwarin. Hewayên germ bêguman pêdiviya avê jî zêde dike. Divê di nava rojê de bi navberên rêk û pêk gelek caran av were vexwarin. Heke xwêdan zêde be avên madenî û dew divê were vexwarin. Herwiha di hewayên germ de vexwarinên kafeîna wan zêde divê neyên vexwarin.
Ji bo xwe hênikkirinê
Di nava rojê de li gorî derfetan divê laş bi ava hênik were şuştin, serçav, patik û zand divê di bin ava sar bên şûştin. Hawayê germ taybetî li cihên girtî bandora xwe zêde dike. Lewre divê mal û kargehên lê tên xebitîn taybetî di saetên hewa hênik de divê derî û pace werin vekirin, dema hewa germ dibe jî divê werin girtin da ku germahiya hundir zede nebe. Heke di malê de klîma were xebitandin jî divê sermaya klîmayê zêde nebe, hevsengiyên li gorî hewayê derve û hundir were avakirin. Germahiya klîmayê 24-26 pile tê pêşnirkirin. Cîhazên bi ceyranê dixebitin pêwîst nebe divê fîşên wan werin kişandin da ku germahiya hundir zêde neke.
Rewşên awarte
Hin rewşên xeter hene ku divê baldariya van deman zêde be. Taybetî dema ser gêj dibe-dizîvire an jî dil dixele-xera dibe, serêşî, vereşandin, şawata zêde (40 °C û jorê wê), xweş lêdana dil û dema çerm germ dibe divê tevdîr werin girtin. Divê di van kêliyan de kes derbasî ciheke hêniktir bibe, cil divê werin kêmkirin û di rewşên xerabtir de alîkariya tendurîstî divê bê xwestin.
