Li gundê Malabadê yê Farqînê malbatên ku li ser qezayek trafîkê gengeşî di navbera wan de çêbûbûn, bi merasîmekê li hev hatin.
Di 12ê Gulanê de li ser rêya Êlih û Amedê qezayeke trafîkê rû dabû. Di qezayê de welatiyên bi navê Tahîr Tûran û Mehmet Alî Donser jiyana xwe ji dest dabûn û welatiyên bi navê Mehmet Nevap M. û Fethullah A. birîndar bûbûn. Ev qeza di navbera malbata Tûran, Donser û Ozalkiş de bûbû sedema gengeşiyê.
Piştî hewldanên mehekê yên ji aliyê Rêxistina DEM Partiyê ya Navçeya Farqînê ve gengeşî hat bidawîkirin û di navbera aliyan de li gundê Malabadê yê ser bi navçeya Farqînê ve bi merasîmekê aştî pêk hat. Hevşaredarê Farqînê Kadri Esen, rêveberên DEM Partiyê û gelek kes tev li merasîma aştiyê bûn.
Kadrî Esen di merasîmê de li ser lihevhatina malbatan û aştiyê axivî û got ku ew ji ber pêkhatina vê aştiyê malbatan pîroz dikin.
