Endama Şandeya Îmraliyê Pervîn Buldan kongreya PKKê wek kongreyeke dîrokî pênase kir û anî ziman ku Abdullah Ocalan jî xwe bi amûrek “ragihandineke teknîkî” gihandiye kongreyê. Buldan got ku wê Erdogan têkildarî mijarê daxuyaniyekê bide.
Endama Şandeya DEM Partiyê ya Îmraliyê Pervîn Buldan têkildarî lidarxistina kongreya 12emîn a PKKê ji Ajansa Mezopotamyayê re axivî.
Buldan kongreyê weke gavek “dîrokî” pênase kir û wiha got: “Bi îhtimaleke mezin ragihandineke teknîkî hebû ka Rêberê Gelê Kurd Abdullah Ocalan beşdarî kongreyê bûye yan na.” Buldan her wiha da zanîn ku Serokê Giştî yê AKPê û Serokkomar Recep Tayyîp Erdogan wê li ser mijarê daxuyaniyekê bide.
‘Kongre dîrokî ye’
Pervîn Buldan da zanîn ku ew di serdemeke gelekî dîrokî re derbas dibin û wiha got: “Em dizanin ku her kes li benda kongreya dîrokî ya PKKê bû. Ji bo aştî were Tirkiyeyê, li Tirkiyeyê demokrasî pêk were, pêwîstî bi vê kongreyê hebû. Dema me bi birêz Ocalan re hevdîtin pêk anî behsa girîngiya pêvajoyê û li Tirkiyeyê pêkhatina aştiyê kir. Digot pêwîstî bi tiştek wiha heye. PKKê ragihand ku kongreya xwe pêk anî û ji bo Tirkiyeyê ser xêrê be. Ji niha û pê ve jî wê kevirên aştiyê bên danîn. Dê pêngavên dîrokî bên avêtin. Bi îhtîmaleke mezin dê bendewarî pêk werin. Ji ber vê yekê pêwîst e girîngiyeke dîrokî bidin vê yekê. Ji bo me hemûyan bi xêr be.”
‘Ragihandinake teknîkî pêk hatiye’
Pervîn Buldan der barê ka Rêberê Gelê Kurd Abdullah Ocalan de beşdarî kongreyê bûye yan na wiha got: “Bi îhtimaleke mezin ragihandineke teknîkî pêk hatiye. Ez naxwazim zêde bikevim nav hûrgulîyan. Ji ber ku hê jî rêyeke me ya dirêj heye. Bi ya min divê daxuyaniyên ku em ê bidin bi baldarî werin kirin. Bi ya min divê zirarê nede pêvajoyê. Ji ber vê yekê, heta ku ev pêvajo bi temamî bi ser bikeve, divê em ji bo axaftinên xwe baldar bin. Dema em bala xwe bidin daxuyaniyên hatine dayîn, îhtimal heye ku di rojên pêş de ravekirineke hîn berfirehtir were kirin. Lê ev yek bi xwe jî ravekirineke girîng e. Ez neçar im behsa rola Sirri Sureyya Onder bikim. Xwezî wî jî ew bidîta. Xwezî wî bikaribûya şahidiya van rojan bikira. Wî gelek ked da. Ez niha li Semsûrê di taziyeya wî de me. Careke din em bi hurmet bejna xwe li ber ruhê wî ditewînin. Em vê diyarî serok Sirri dikin. ”
Dê Erdogan daxuyanî bide
Pervîn Buldan diyar kir ku Serokkomar Erdogan wê li ser mijarê daxuyaniyekê bide û got: “Ew ê jî di demeke kurt de daxuyaniyekê bide. Ez naxwazim li ser vê yekê nirxandinekê bikim. Lê belê bi ya min Birêz serokkomar wê di demeke kurt de daxuyaniyekê bide.”
