Xelkê Sêrtê û siyasetmedarên xwe li dijî tayînkirina qeyûm hêrsa xwe nişan didin. Parlamenterê DEM Partiyê Huseyîn Olan diyar kir ku tayînkirina qeyûm durûtî ye û gelê Kurd li ber qeyûman wê serî netewîne.
Wezareta Karên Navxweyî yê Tirk 29ê Çile qeyûm tayinî şeredariya Sêrtê ya DEM Partî kir. Piştî qeyûm tayinî şeredariyê kir, hevşeredar Sofya Alagaş û Mehmet Kaysî ji pêywîrê hatin dûrxistin û li şûna wan Waliyê Sêrtê Kemal Kizilkaya pêywîrdar kirin. Piştî tayînkirina qeyûm gelê Sêrtê ji duh ve li pêşiya şeredariyê qeyûm protesto dikin. Protestoya li dijî tayinkirina qeyûm di roja 2an de berdewam dike.
Polîsan derdora Şerdariyê dorpêç kirin e û nahêlin ku gel nêzî avahiya şeredariyê bibe. Girseyê bertek nîşanî dorpêçê dan û di navbera polîs û girseyê de gengaşî çêbû. Girsêya bi gerandina govendê, stranan û dirûşman hêrsa xwe nîşanî dorpêça polîsan û qeyûm dan. Piştî demekê polîs neçar man ku dorpêçê rakin. Bi rakirina dorpêçê re girse bi dirûşmeyan hatin ber şeredariyê û li vir çalakiya rûniştinê li dar xistin. Girseyê li vir bi stran û dirûşmeyan çalakiya xwe domandin. Hevşredarên Sêrtê Sofya Alagaş, Mehmet Kaysi û parlamenterên DEM Partî li ber şeredariyê daxuyanî dan. Di daxuyaniyê de pankartên bi nivîsa “Qeyûm darbeya li dijî vîna gel e” û “Em ê li dijî desteserkirina îradeyê bi berxwedanê bi ser bikevin” hatin vekirin.
Destpêkê Hevserokê DEM Partiya Sêrtê Eşref Tekîn axivî û bi xêrhatina gel kir.
‘Em ê xwedî li şaredariya xwe û vîna xwe derbikevin’
Paşê Parlamenterê DEM Partiyê yê Bedlîsê Huseyîn Olan axivî û wiha bertek nîşanî tayîkirina qeyûm da: “Em dibêjin ev dagirkerî ye. Hûn ala xwe jî daliqînin nikarin şerma xwe vêşerin. Hûn çi dikin bikin ev gel danîna qeyûm qebûl nake. Hûn sed carî qeyûm tayîn bikin jî nikarin bi ser bikevin. Ji aliyekî ve dibêjin aştî ji aliyê din ve jî qeyûm tayîn dikin. Ev durûtî ye. Gelê me li dijî vê yekê serî natewîne. Dûh çawa serî netewand îro jî natewîne. Ji bo wê jî çiqas qeyûm tayîn bikin jî gel qebûl nake. Heke hûn bibêjin em ê bi gelê Kurd re hevdîtinê bikin, navnîşan diyar e; navnîşan birêz Abdullah Ocalan e. Ji bo ev firseta dawî winda nebe divê vê pêvajoyê aştiyê pêk were. Îro şûn ve jî em ê xwedî li şeredariya xwe derbikevin û vê qebûl nakin. Banga me li gelê Sêrtê ev e; xwedî li şeredariya xwe û vîna xwe derbikevin.”
Parlamentera DEM Partiyê ya Amedê Adalet Kaya jî bi bîr xist ku vîna gelê Sêrtê cara sêyemîn e tê desteserkirin û nerazîbûn nîşanî tayînkirina qeyûm da.
Daxuyanî bi berzkirina dirûşmeya “Bijî berxwedana gelê Kurd” bi dawî bû.
