Amed – Li Qada Şêx Seîd a Amedê bi hezaran kesî banga Rêberê PKKê Abdullah Ocalan guhdar kir. Piştî ku peyama Rêberê PKKê Abdullah Ocalan hat xwendin welatiyan fikir û bendewariyên xwe anîn ziman û xwestin tecrîd bi dawî bibe û Abdullah Ocalan azad bibe.
Şandeya Partiya Wekhevî û Demokrasiyê ya Gelan (DEM Partî) ya Îmraliye piştî hevdîtin bi Rêberê PKKê Abdullah Ocalan re pêk anî, saet di 17.00ê 27ê Sibatê de li Otêla Elîte Worldê ya Stenbolê banga Abdullah Ocalan a dîrokî bi raya giştî re parve kir. Peyama Abdullah Ocalan li Amedê jî hat guhdarkirin. Li Şirnex, Sêrt, Êlih, Mêrdîn, Çewlig, Riha, Dîlok, Meletî, Dêrsim, Semsûr û navçeyên wan bi hezaran welatî hatin Qada Şex Seîd. Gelê Amedê jî di seatên nîvro da li qadê kom bû û govend girt li benda peyama Abdullah Ocalan ma. Piştî daxuyanî hat guhdarkirin gelê li qadê ji Ajansa Welat (AW) re axivî û fikir û hestên xwe anî ziman.
Em ji bo aştiyê amade ne
Welatî Huseyîn Taniş bibîrxist ku hezar salin li virin û ew ji bo her tiştî amade ne û got: “Ji bo ku şer li Kurdistanê û Tirkiyeyê heye bi hezaran mirovî jiyana xwe dest da. Ev 40 salin li Rojhilata Navîn xwîn dirije, gelek bedelên giran hatin dayîn. Gelê Kurd ne evîndarê derketina çiya bû, ji bo daxwazên xwe derket ser çiyan. Divê mafên gelê Kurd, çand û zimanê me di destûra bingehîn de bê erêkirin. Gelê Kurd ne dijminê tu kesiye. Bi hezaran salin em li virin û em dibêjin ji bo aştiyê em amade ne.”
Zimanê Kurdî bibe zimanê perwerdehiyê
Welatîe Mehmet Alp jî destnîşan kir mafên kurdan bên naskirin û wiha got: “Li cîhanê mirin tiştêkî herî nebaş e, bila mirin tunebe, em di nav jiyaneke rûmet de bijîn. Aştiyeke bişeref were welatê me. Gelê me pêwîst e vî wextî piştgiriyê bidê hev. Em dixwazin tu kes nemire. Dewlet pêwîst e ku xweseriya kurdan nasbike. Gere zimanê Kurdî bibe zimanê perwerdehiyê û polîtîkayên bişaftinê bên sekinandin.”
Divê tecrîd rabe Abdullah Ocalan azad be
Welatî Fatîme Taniş jî diyar kir ku êdî pêwîst e dewlet gavên fermî bavêje û wiha got: “Em aştiyê dixwazin, bila êdî kes nemire ne gerila ne jî leşker. Serok û welatê me azad be. Piştî vî wextî êdî xwîn nerije. Pêwîste êdî gavên fermî bên avêtin. Tecrîd rabe Abdullah Ocalan azad be.”
Pêwîste em gelê kurd bên naskirin
Welatî Mahmût Yayasît jî da zanîn ku heta aştî neyê ew doza xwe bernadin û wiha got: “Em êdî ji bo gelê xwe azadiyê dixwazin, tu daxwaziya me ji azadiyê zêdetir tune ye. Piştî banga birêz Ocalan pêwîst e êdî dewlet gav bavêje û bibêje em birayên hev in. Heke tu gav neavêje em doza xwe bernadin. Pêwîste em gelê kurd bên naskirin.”
Welatî Yilmaz Altindag jî bendewariyên xwe anîn ziman û wiha got: “Em dixwazin aştî û hizûr were, em naxwazin êdî gelê kurd di bin zilmê de be. Piştî vê bangê gere êdî dewlet heq û hiqûqê kurdan nas bike.”
